सिलगढी: आज सिलिगुडीस्थित मिलन मोडको लिटिल एन्जल्स स्कुलमा आयोजित २३औँ स्थापना दिवस समारोहमा सहभागी हुन पाउँदा दार्जिलिङ लोकसभा सांसद राजु विष्टले उनको लागि ठूलो सम्मानको विषय रहेको बताए। सन् २००२ मा स्थापना भएको लिटिल एन्जल्स स्कुलले साना सुरुवातबाट आज उत्कृष्टताको केन्द्र (सेन्टर अफ एक्सिलेन्स) का रूपमा आफूलाई स्थापित गरेको देख्दा सांसदले अत्यन्तै गर्व महसुस गरे।
आजको समारोहको विषयवस्तु “विरासत – संस्कृतिहरूको अन्वेषण र परम्पराहरूको आत्मसात्” विद्यालयको यात्रालाई मात्र होइन, भारतको समृद्ध सांस्कृतिक धरोहरलाई पनि सुन्दर ढंगले प्रतिबिम्बित गर्ने खालको थियो। साथै विद्यालयले संग्रहालय स्थापना गरेकोमा पनि सांसदले हार्दिक बधाई दिए जुन सम्भवतः उत्तर बंगालको पहिलो निजी विद्यालय हो।
हाम्रो क्षेत्रका युवाहरू विभिन्न क्षेत्रमा उत्कृष्ट प्रदर्शन गरिरहेका छन्। सिलिगुडीकी छोरी रिचा घोषले भारतको विश्वकप जितमा पुर्याएको योगदान, महिला फुटबलमा कोच क्रिस्पिन छेत्रीको नेतृत्व, तथा हाम्रो क्षेत्रबाट यूपीएससी परीक्षामा सफल भएका अभ्यर्थीहरू यसको केही उदाहरण मात्र हुन्। तर, एउटा क्षेत्र जहाँ अझै सुधार र विकासको आवश्यकता महसुस हुन्छ, त्यो भने उद्यमशीलता (Entrepreneurship) हो। यस उद्यमशील भावनालाई प्रोत्साहित गर्न विद्यालय र कलेज तहदेखि नै उद्यमशीलता शिक्षालाई पाठ्यक्रममा समावेश गर्नु अत्यावश्यक छ भन्ने सांसदले दृढ विश्वास राखे।
युवाहरूलाई मार्गदर्शन (मेन्टरसीप) तालिम तथा वित्तीय साक्षरता प्रदान गर्नुपर्छ। उद्यमशीलताले व्यक्तिलाई आत्मनिर्भर बनाउनुका साथै अरूका लागि रोजगारीका अवसरहरू पनि सिर्जना गर्दछ भनि सांसदले संजाल मार्फत आफ्नो अभिव्यक्ति पोखे।
उनले हाम्रो क्षेत्रबाट विश्वस्तरका उद्यमीहरू उदय भएको देख्न आतुर रहेको र आजका विद्यार्थीहरू मध्ये कोही न कोही भविष्यमा व्यवसायिक क्षेत्रमा महान् नेतृत्वकर्ता बन्नेछ भन्ने आशा गरे। अन्तमा उनले हाम्रा युवाहरूलाई ठूलो सपना देख्न र परम्परागत करियर मार्गभन्दा बाहिर सोच्न प्रेरित गर्न सबै समक्ष अपिल गरे।
About Author
