दार्जिलिङ पहाड, तराई–डुवर्स क्षेत्र तथा पश्चिम बंगालसँग सम्बन्धित वर्तमान राजनीतिक विषयहरूबारे गरे छलफल

नयाँ दिल्ली: दार्जिलिङ संसदीय क्षेत्रका सांसद राजु विष्टले माननीय केन्द्रीय गृहमन्त्री अमित शाहसँग भेटघाट गर्ने सौभाग्य प्राप्त गरेको जानकारी सामाजिक सञ्जालमार्फत सार्वजनिक भएको छ। बिहारमा हासिल भएको शानदार विजय तथा हालै सम्पन्न केरलाका नगरपालिका र पञ्चायत चुनावमा भारतीय जनता पार्टी (बीजेपी) ले गरेको उल्लेखनीय प्रगतिका लागि सांसदले गृहमन्त्रीलाई बधाई दिएका छन्।
सामाजिक सञ्जालमा सार्वजनिक जानकारी अनुसार, सांसदले दार्जिलिङ पहाड, तराई–डुवर्स क्षेत्र तथा पश्चिम बंगाल राज्यसँग सम्बन्धित वर्तमान राजनीतिक विषयहरूबारे गृहमन्त्रीसँग छलफल गरे। उनले राज्यका जनता परिवर्तनका लागि संघर्षरत रहेको जानकारी पनि गराएका छन्।
माननीय प्रधानमन्त्री श्री नरेन्द्र मोदीज्यूको नेतृत्वमा तथा माननीय गृहमन्त्री श्री अमित शाहज्यूको मार्गदर्शनमा भारतीय जनता पार्टीका प्रत्येक कार्यकर्ता टीएमसी मुक्त पश्चिम बंगाल सुनिश्चित गर्न निरन्तर रूपमा काम गरिरहेका छन् भनी सांसदले उल्लेख गरेका छन्।
सांसदले आतङ्कको शासन, राजनीतिक हत्या, व्यापक भ्रष्टाचार, नातावाद, घोटाला, ध्वस्त कानून व्यवस्था तथा जड अर्थतन्त्रको अन्त्य गरिनेछ भन्ने विश्वास व्यक्त गर्दै बंगाल फेरि उठ्नेछ र आफ्नो गौरव पुनः प्राप्त गर्नेछ भनी सबैलाई आश्वस्त गराएका छन्।