कोलकाता: ऐतिहासिक गंगासागर मेला अब केही हप्तामै सुरु हुँदैछ र तयारीलाई अन्तिम रूप दिने कार्य तीव्र गतिमा अघि बढिरहेको छ। प्रशासन, प्रहरी, विपद् व्यवस्थापन तथा सम्बन्धित सबै निकाय यस वर्षको मेलालाई अझ सुरक्षित, व्यवस्थित र आकर्षक बनाउन दिनरात खटिएका छन्।
यस वर्ष भक्तजनलाई विशेष आध्यात्मिक अनुभूति गराउन मेलामा एक अनौठो पहल गरिएको छ। दीघाको प्रसिद्ध जगन्नाथ मन्दिरको भव्य प्रतिकृति निर्माणाधीन रहेको छ, जुन मेलाको प्रमुख आकर्षण बन्नेछ। विशेषज्ञ कलाकार तथा निर्माण टोली सक्रिय रूपमा प्रतिकृति बनाउन व्यस्त छन् र मुख्य मेला प्रारम्भ हुनु अघि नै निर्माण सकिने लक्ष्य राखिएको छ।
यस प्रतिकृतिले श्रद्धालुलाई दीघास्थित वास्तविक मन्दिर जस्तै पवित्र वातावरण र भव्यता प्रदान गर्नेछ। साथै महाकाल मन्दिरको नमुनामा आधारित विशेष देवस्थान संरचना पनि तयार गरिँदैछ, जसले भक्तजनलाई एउटै स्थानमा विभिन्न धार्मिक तथा आध्यात्मिक अनुभव दिलाउनेछ।
अधिकारिहरूका अनुसार, टाढा–टाढाबाट आउने श्रद्धालुले यदि बंगालका प्रमुख मन्दिरहरूको दर्शन एकै स्थानमा पाउन सके, उनीहरूको धार्मिक यात्रा झनै समृद्ध हुनेछ। यसअघि सन् २०२३ को सागर मेलामा कालीघाट, तारापीठ र दक्षिणेश्वर मन्दिरका प्रतिकृतिहरू अत्यधिक सराहना प्राप्त गरेका थिए। यही सकारात्मक प्रतिक्रियालाई मध्यनजर गर्दै प्रशासनले २०२६ को मेलामा जगन्नाथ र महाकाल मन्दिरका प्रतिकृतिलाई मुख्य आकर्षण बनाउने निर्णय गरेको हो।
मुख्यमन्त्री ममता बनर्जी पनि विगतझैँ यसपालि पनि गंगासागर पुगेर अन्तिम तयारीको निरीक्षण गर्नेछिन्। प्रशासनलाई विश्वास छ कि यस वर्षको गंगासागर मेला आध्यात्मिकता, आकर्षण र भव्यताका नयाँ आयाम स्थापित गर्नेछ।