गान्तोक: सिटिजन एक्शन पार्टी (क्याप) ले आज गान्तोकमा एकदिने शान्तिपूर्ण धरना आयोजना गर्यो। धरना हालै सिक्किम लोक सेवा आयोग (एसपीएससी) द्वारा प्रकाशित सिक्किम पुलिसको सब-इन्स्पेक्टर (एसआई) भर्ती प्रक्रियामा विरोध स्वरूप आयोजना गरिएको हो।
पार्टीले भर्ती प्रक्रियामा पारदर्शिताको अभाव, भाइभतीजावाद र राजनीतिक पक्षपात भएको आरोप लगाएको छ। क्यापको दाबी अनुसार, ३९ पदका लागि भएको चयन प्रक्रियामा गम्भीर अनियमितता देखिएको छ जसले हजारौं मेहनती सिक्किमेली युवाहरूको अधिकारमा अन्याय गरेको छ।
क्यापले भनेको छ कि चयनित उम्मेदवारमध्ये लगभग ८०% सत्तारूढ एसकेएम पार्टीसँग सम्बन्धित छन्। यसमा पार्टी कार्यकर्ता, सामाजिक सञ्जाल ह्यान्डलर र सरकारका उच्च पदाधिकारीहरूसँग नजिकका व्यक्तिहरू समावेश छन्। पार्टीले एसपीएससीको विश्वसनीयतामा प्रश्न उठाउँदै, परीक्षामा सहभागी सबै उम्मेदवारहरूको विस्तृत मार्कसिट तुरुन्त सार्वजनिक गर्न माग गरेको छ।
धरना अघि क्यापले इन्दिरा बाईपासदेखि र्याली निकालेको थियो, जुन जिल्ला प्रशासन केन्द्र परिसर पुगेपछि धरनामा परिणत भयो। पार्टीका नेताहरूको अनुसार, यस कदमले सरकार र आयोगलाई स्पष्ट सन्देश दिएको छ कि युवा र नागरिकहरू सार्वजनिक भर्तीमा भ्रष्टाचार र राजनीतिक हस्तक्षेप सहन तयार छैनन्।