‘भारत तटस्थ होइन, शान्तिको पक्षमा छ’: प्रधानमन्त्री मोदी

नयाँ दिल्ली: भारत–रूसबीच हैदराबाद हाउसमा भएको शिखर वार्तामा भारतीय प्रधानमन्त्री नरेन्द्र मोदीले यूक्रेन संकटबारे भारत “तटस्थ नभई शान्तिको पक्षमा दृढतापूर्वक उभिएको” स्पष्ट संदेश दिएका छन्।
रूसी राष्ट्रपति भ्लादिमिर पुतिन भारतको ऐतिहासिक भ्रमणका क्रममा आज दिल्ली पुगे, जहाँ राष्ट्रपति भवनमा उनको औपचारिक स्वागत गरिएको थियो। त्यसपछि उनले राजघाटमा महात्मा गान्धीलाई श्रद्धाञ्जली अर्पण गरे।
वार्ताका क्रममा प्रधानमन्त्री मोदीले विश्व समुदायलाई यूक्रेन युद्धको समाधानका लागि “शान्तिको मार्ग खोज्न” आग्रह गरे।
राष्ट्रपति पुतिनले पनि भारतले अघि सारेका शान्ति पहलप्रति आभार व्यक्त गर्दै रूस “शान्तिपूर्ण समाधानका लागि प्रतिबद्ध” रहेको बताए।
दुवै नेताबीच आर्थिक साझेदारी, ऊर्जा, सुरक्षा तथा व्यापार विस्तारलगायत विषयमा छलफल भइरहेको छ। आजै केही महत्वपूर्ण समझदारीपत्रहरूमा हस्ताक्षर हुने अपेक्षा गरिएको छ।