सिलगढी: राज्यभर विशेष गहन पुनरीक्षण (एसआईआर) प्रक्रिया शुरु भएसँगै योग्य मतदाता सूचिबाट नछुटियोस् भन्ने उद्देश्यले प्रत्येक बूथमा बूथ लेभल अफिसर (बीएलओ) तैनाथ गरिनुका साथै ‘बंगला भोट रक्षा शिविर’ पनि सञ्चालन भइरहेका छन्।
आइतवार सिलगढीका मेयर गौतम देव नक्सलबारीमा आयोजित यस्तै शिविरमा पुगेका थिए, जहाँ उनले जारी कार्यको स्थलगत निरीक्षण गरे।
तृणमूल कांग्रेसले सर्वसाधारणलाई असुविधा र झन्झटबाट जोगाउनका लागि यस्ता शिविरहरूको पहल गरेको छ। मेयर देवले नक्सलबारी ब्लक–२ मा आयोजना गरिएको शिविरमा पुगेर सम्पन्न गतिविधिहरूको प्रगति समीक्षा गरे।
निरीक्षणका क्रममा सिलगढी महकुमा परिषदका सभाधिपति अरुण घोष तथा अन्य जनप्रतिनिधिहरू पनि उपस्थित थिए।
मेयर देवका अनुसार, “बंगला भोट रक्षा शिविरमा राम्रो प्रगति भइरहेको छ। सिलगढी विधानसभामा अधिकांश काम पूरा भइसकेको छ। बीएलओ र बीएलए–२ कर्मचारीहरूले निकै सन्तोषजनक कार्य गरेका छन्।”