गान्ताेक: सिक्किमको प्राकृतिक सुन्दरता, सांस्कृतिक विविधता तथा विकास परियोजनाको अवलोकनका क्रममा सिक्किम आइपुगेको मुम्बईका वरिष्ठ पत्रकारहरूको टोलीले आज राज्यपाल ओमप्रकाश माथुरसँग राजभवनमा शिष्टाचार भेट गरेको छ।
मुम्बई प्रेस क्लबका अध्यक्ष मनोज जालनावालाको नेतृत्वमा आएको प्रतिनिधिमण्डलमा महाराष्ट्र र मुम्बईका प्रमुख मराठी, हिन्दी तथा अंग्रेजी दैनिक पत्रिकाका पत्रकारहरू समावेश छन्। टोलीले सिक्किममा पर्यटन, पूर्वाधार विकास, जैवविविधता संरक्षण तथा राज्य–केन्द्र सरकारका चलिरहेका कल्याणकारी परियोजनाहरूको प्रत्यक्ष अध्ययन गर्ने उद्देश्य राखेको जनाएको छ।
राज्यपाल माथुरले प्रतिनिधिमण्डललाई स्वागत गर्दै सिक्किमको टिकाउ विकास मोडेल, अनुशासित ट्राफिक, स्वच्छता, महिला सशक्तिकरण तथा सीमावर्ती क्षेत्रहरूमा भइरहेको पूर्वाधार सुदृढीकरणबारे विस्तृत जानकारी गराए।
भेटका क्रममा पत्रकारहरूले वाइब्रेन्ट भिलेज कार्यक्रम, सीमावर्ती क्षेत्रमै सञ्चालित योजनाहरूमा स्थानीय सहभागिता, तथा पर्यटनलाई अझ प्रतिस्पर्धी बनाउन आवश्यक नीतिगत सुधारहरूका विषयमा राज्यपालसँग गम्भीर छलफल गरेका थिए।
भ्रमण टोलीले सिक्किमका विकास योजनाहरू, प्राकृतिक सौन्दर्य तथा राज्य सरकारको सक्रियताले आफूहरूलाई प्रेरित बनाएको उल्लेख गर्दै, सिक्किमका सकारात्मक पहलहरू महाराष्ट्रका लाखौँ पाठकमाझ पुर्‍याउन यो भ्रमण उपयोगी भएको प्रतिक्रिया जनाएको छ।