कोलम्बो: एक सातादेखि लगातार परेको भारी वर्षा, बाढी र पहिरोका कारण श्रीलङ्कामा मृत्यु हुनेको संख्या ५६ पुगेको अधिकारीहरूले बताएका छन्। बिग्रँदो मौसमका कारण सरकारले शुक्रबार देशभरका सरकारी कार्यालय र विद्यालय बन्द गरेको छ।
अत्यधिक वर्षाका कारण विभिन्न स्थानमा पहिरो गएको छ भने घर, खेत र सडकहरू डुबानमा परेका छन्।
मध्य पहाडी क्षेत्रमा ठूलो क्षति:
राजधानी कोलम्बोबाट करिब ३०० किलोमिटर टाढा रहेका चिया उत्पादक क्षेत्र — बादुल्ला र नुवारा एलिया मा बिहीबार पहिरोले २५ भन्दा बढीको ज्यान गएको छ।
डिजास्टर म्यानेजमेन्ट सेन्टरका अनुसार ती क्षेत्रहरूमा २१ जना हराइरहेका छन् र १४ जना घाइते छन्।
शुक्रबार कार्यालय र विद्यालय बन्द:
धेरै नदी र जलाशय भरिभराउ भएपछि सडक अवरुद्ध बनेका छन्। बिग्रँदो मौसमलाई मध्यनजर गर्दै सरकारले शुक्रबारका लागि सबै सरकारी कार्यालय र विद्यालय बन्द गराएको छ।
उडानहरू भारततर्फ मोडियो:
कोलम्बोमा खराब मौसमका कारण पश्चिम एशियातर्फ जाँदै गरेका तीन उडान र मलेसियाबाट आउने एक उडानलाई मार्ग परिवर्तन गरी भारत काे तिरुवनन्तपुरम अन्तर्राष्ट्रिय विमानस्थलमा अवतरण गराइएको अधिकारीहरूले जनाएका छन्।
बाढी–पहिरोको प्रभाव बढ्दै:
डिजास्टर म्यानेजमेन्ट सेन्टरका अनुसार देशका १७ जिल्लामा करिब ५,८९३ मानिस प्रभावित भएका छन्।
पछिल्ला ४८ घण्टामै ३७ जनाको मृत्यु दर्ता भएको छ।
बट्टिकालोआ क्षेत्रमा दुई दिनमै ३०० मिलिमिटरभन्दा बढी वर्षा मापन गरिएको छ।