नातावादको अन्त्य र सुशासनको माग गर्दै शुरु भएको आन्दोलनको आधारमा बनेको सुशीला कार्की नेतृत्वको सरकारसँग जोडिएका विवादका कारण कतिपय जेन जी युवाहरू असन्तुष्ट बनेका छन्।
प्रधानमन्त्री र गृहमन्त्रीको विरोधमा कालोपट्टी लगाएर सिंहदरबारमा पुग्ने क्रममा जेन जी अगुवा मिरज ढुङ्गानालाई मंगलबार प्रहरीले नियन्त्रणमा लिएको थियो। तर जेन जी अगुवा रिजन रानामगरका अनुसार, उनीहरू प्रधानमन्त्रीको राजीनामा माग्ने पक्षमा छैनन्।
“हामीले सुशासनको पक्षमा कुरा गर्दैछौँ, तर असन्तुष्ट साथीहरूले प्रधानमन्त्रीको राजीनामा मागेर देशलाई अनिश्चिततातर्फ डोर्‍याउन खोजिरहनुभएको छ, त्यो कुरामा हाम्रो विमति छ,” रानामगर भन्छन्।
जेन जी युवाहरूको असन्तुष्टिको केन्द्रमा दुई विवाद छन्। पहिलो, राजधानीको निजी फर्टिलिटी क्लिनिकसँग सम्बन्धित मुद्दा, जसमा दुई नाबालिगबाट डिम्ब सङ्कलन गरिएको थियो। महान्यायाधिवक्ताको कार्यालयले मुद्दा दायर नगर्ने निर्णय गरेपछि, जेन जी युवा रानामगरले यो निर्णयमा स्वार्थको द्वन्द्व देखिएको आरोप लगाएका छन्।
दोस्रो विवाद प्रधानमन्त्री कार्कीका प्रमुख स्वकीय सचिव आदर्श श्रेष्ठसँग जोडिएको छ। श्रेष्ठले आफ्ना आफन्तलाई सचिवालयमा नियुक्त गरेको आरोप उब्जिएपछि जेन जी युवाहरूले स्पष्टिकरण र जिम्मेवारी मागेका छन्।
राजनीतिशास्त्री कृष्ण खनालका अनुसार, यी विवादले कार्की सरकारको स्वच्छ छविमा असर पुर्‍याउन सक्छ। तर खनालले सरकारका केही निर्णय, जस्तै मुख्यसचिव र प्रहरी प्रमुखको नियुक्ति, पूर्वप्रक्रियाअनुसार भएको भन्दै सकारात्मक मूल्याङ्कन पनि गरेका छन्।
जेन जी अगुवा रानामगरका अनुसार, सरकारसँग असन्तुष्ट देखिएका युवाहरूले उठाएका विषय संवादमार्फत् सम्बोधन गर्नु उचित हुनेछ।