गुवाहाटी: भारतले घरेलु टेस्ट सीरीजमा फेरि एकपल्ट लाजमर्दो हारको सामना गर्नु पऱ्यो। दक्षिण अफ्रिकाले गुवाहटीमा भएको दोस्रो टेस्ट म्याचमा भारतलाई ४०८ रनले पराजित गरी २ वटा टेस्ट म्याचको सीरीज क्लीन स्वीप गऱ्यो। दक्षिण अफ्रिकाले यसअघि कलकत्तामा खेलिएको पहिलो टेस्ट म्याचमा ३० रनले जीत हासिल गरेको थियो। दोस्रो टेस्ट म्याचमा भारतलाई जीतको निम्ति ५४९ रन बनाउने कठिन लक्ष्य हासिल भएको थियो। विशाल लक्ष्यलाई पीछा गर्दै भारत म्याचको पाँचौं तथा अन्तिम दिन बुधवार आफ्नो दोस्रो ईनिंग्समा केवल १४० रन बनाएर अलआउट भयो। टेस्ट क्रिकेटको इतिहासमा यो भारतको रनको अन्तरले अहिलेसम्मको सबैभन्दा ठूलो हार हो। यसअघि भारतले २००४-मा नागपुरमा अष्ट्रेलियाविरुद्ध ३४२ रनले हारको सामना गर्नु पऱ्यो। यसरी दक्षिण अफ्रिकाले भारतमा २५ सालपछि टेस्ट सीरीज जित्यो। यसअघि दक्षिण अफ्रिकाले २०००-मा हेन्सी क्रोन्येको कप्तानीमा भारतमा टेस्ट सीरीज जितेको थियो। गौतम गम्भीरले मुख्य प्रशिक्षक पद सम्हालेपछि १३ महिनाभित्र यो भारतलाई कुनै टीमले टेस्ट सीरीजमा क्लीन स्वीप गऱ्यो। यसअघि अक्टोबर-नोभेम्बर २०२४-मा न्यूजील्याण्डले पनि भारतमा ३-०-ले टेस्ट सीरीज जितेको थियो। यसरी लगातार हारले भारतले वर्ल्ड टेस्ट च्याम्पियनशीपको सम्भावनाहरूलाई ठूलो झट्का लागेको छ।
गुवाहाटी टेस्ट म्याचमा तेम्बा बावूमाको कप्तानीमा रहने दक्षिण अफ्रिकाले आफ्नो पहिलो ईनिंग्समा ४८९ रन बनाएको थियो। त्यसपछि भारत केवल २०१ रन बनाएर अलआउट हुँदा दक्षिण अफ्रिकाले पहिलो ईनिंग्सको आधारमा २८८ रनको महत्त्वपूर्ण बढ़त हासिल गरेको थियो। दक्षिण अफ्रिकाले पछिबाट ५ विकेटमा २६० रनको स्कोरमा आफ्नो दोस्रो ईनिंग्स घोषित गर्दा भारतलाई म्याच जित्न ५४९ रन बनाउने लक्ष्य हासिल भएको थियो। भारतले चौथो दिनको खेल समाप्त हुँदासम्म नै यशस्वी जयसवाल १३ र केएल राहुल ६ रन-को ओपनिंग जोड़ीलाई गुमाएको थियो।

त्यसपछि आज बिहान पनि भारतीय ब्याटरहरूले असहाय आत्मसमर्पण गरे। रविन्द्र जडेजालाई छोड़ेर अन्य कसैले पनि लड़ाइँ गर्न सकेनन्। साई सुदर्शनले १३९ बल खेले पनि केवल १४ रन बनाए। जडेजाले ४ वटा चौका र २ वटा छक्काको साथ ८७ बलमा सर्वाधिक ५४ रन बनाए। दक्षिण अफ्रिकी स्पिनर साइमन हार्मरले उत्कृष्ट बलिंग गर्दै भारतको ब्याटिंग क्रमलाई ध्वस्त पारे। हार्मरले ६ विकेट लिए। कुलदीप यादव ५, ध्रुव जुरेल २, कप्तान रिषभ पन्त १३, वाशिंगटन सुन्दर १६ र नीतीश कुमार रेड्डी शून्य रनमा आउट भए। दक्षिण अफ्रिकाको पहिलो ईनिंग्समा ९३ रन बनाउनको साथै ७ विकेट पनि लिने मार्को यानसनले प्लेयर अव् द म्याचको पुरस्कार जिते।