न्यूयोर्क: फिफाले आउँदो साल हुने फूटबल वर्ल्ड कपको ड्र-लाई लिएर ठूलो अपडेट जारी गरेको छ। फिफा वर्ल्ड कप २०२६-को निम्ति ड्र आउँदो हप्ता जारी गरिनेछ। यस ड्र-मा पहिलोपल्ट टेनिस-स्टाइल नक्आउट ब्रेकेट सिस्टम लागू गरिनेछ, जसअन्तर्गत विश्वका शीर्ष ४ वटा टीम स्पेन, अर्जेण्टिना, फ्रान्स र ईंग्ल्याण्डलाई अलग-अलग हिस्सामा राखिनेछ। यसरी यी ४ वटा टीमले ग्रुपमा पहिलो स्थान हासिल गरे सेमिफाइनल अघि एकार्काविरुद्ध खेल्नु पर्ने छैन। फिफाले यस नयाँ सिस्टमको उद्देश्य लगातार असल प्रदर्शन गर्ने टीमहरूलाई ऱ्याङकिंगको आधारमा फाइदा दिनु रहेको जनाएको छ। यसको साथ ठूलो म्याचहरूलाई अन्तिम चरणसम्म सुरक्षित राख्न सकिनेछ। यसले टुर्नामेण्टलाई प्रतिस्पर्धात्मक र सन्तुलित बनाइ राख्नमा पनि फाइदा पुग्नेछ। फिफाद्वारा जारी बयानमा भनिएको छ, शीर्ष टीमहरूबीच सन्तुलन कायम राख्न अनि योग्य प्रदर्शनलाई सम्मान प्राप्त होस् भनेर २ अलग-अलग बाटो तयार गरिएको छ। यसपाली वर्ल्ड कपमा ४८ वटा टीमले हिस्सा लिनेछ, जुन टुर्नामेण्टको इतिहासमा पहिलोपल्ट हुनेछ। यसरी जम्मा १२ वटा ग्रुप हुनेछ अनि प्रत्येक ग्रुपमा ४ वटा टीम रहनेछ। ड्र यसरी डिजाइन गरिएको छ कि एउटै महाद्वीपको २ गैर यूरोपियन टीम एउटा ग्रुपमा रहन सक्दैन। यसरी यूरोपियन टीमहरूको संख्या प्रत्येक ग्रुपमा अधिकतम २ सम्म सीमित रहनेछ। टुर्नामेण्टको ड्र ५ दिसम्बरमा वाशिंंगटन डीसी-को केनेडी सेण्टरमा हुनेछ, जसमा विशेष अतिथिको रूपमा अमेरिकी राष्ट्रपति डोनाल्ड ट्रम्प पनि उपस्थित रहनेछन्। यसरी कुनै वर्ल्ड कपको ड्र-मा यसपाली पहिलोपल्ट कुनै राजनेताले फूटबलका दिग्गजहरूसँग मञ्च साझा गर्नेछन्। वर्ल्ड कपको निम्ति अहिलेसम्म ४२ वटा टीमले क्वालीफाई गरिसकेको छ, जसमा ईरान र हैती पनि सामेल छ। यी दुई देशको अमेरिकासँग राजनैतिक तनाउ रहेको छ। चारपल्टको च्याम्पियन इटली कम्ती ऱ्याङकिंगले गर्दा पट ४-मा हुन सक्नेछ। यसले टीमले शुरुवातदेखि नै कड़ा चुनौतीको सामना गर्नु पर्ने सम्भावना छ। ड्र-मा टीमहरूलाई उनीहरूका ऱ्याङकिंग र क्वालीफिकेशन स्टाटसको आधारमा ४ वटा पट-मा राखिनेछ।
पट १ (शीर्ष ऱ्यांक टीमहरू)ः स्पेन, अर्जेण्टिना, फ्रान्स, ईंग्ल्याण्ड, ब्राजील, पोर्तुगल, नीदरल्याण्ड, बेल्जियम, जर्मनी, अमेरिका, मेक्सिको र कनाडा।
पट २ः क्रोएशिया, मोरक्को, कोलम्बिया, उरुग्वे, स्विट्जरल्याण्ड, जापान, सेनेगल, दक्षिण कोरिया, इक्वाडोर, अष्ट्रिया र अष्ट्रेलिया।
पट ३ः नर्वे, पनामा, इजिप्ट, अल्जीरिया, स्कटल्याण्ड, प्याराग्वे, ट्यूनिशिया, आइवरी कोस्ट, उज्बेकिस्तान, कतर, सऊदी अरब र दक्षिण कोरिया।
पट ४ः जर्डन, केप भर्दे, घाना, कुरासाओ, हैती, न्यूजील्याण्ड, यूरोपियन प्लेअफ् विजेता १, यूरोपियन प्लेअफ् विजेता २, यूरोपियन प्लेअफ् विजेता ३, यूरोपियन प्लेअफ् विजेता ४, इण्टरकण्टिनेण्टल प्लेअफ् विजेता १ र इण्टरकण्टिनेण्टल प्लेअफ् विजेता २।
यूरोपको अधिकतम २ वटा टीम मात्र एउटा ग्रुपमा रहनेछ। अन्य महाद्वीपहरूका टीमहरूलाई आफ्नै महाद्वीपका टीमसँग एउटै ग्रुपमा राखिनेछैन। आयोजक अमेरिकाले टुर्नामेण्टमा शुरुवात १२ जून २०२६-मा पट ३-को टीमसँग गर्नेछ। त्यसपछि पट २ र पट ४-को टीमसँग खेल्नु पर्नेछ। नयाँ ड्र फर्मेटले वर्ल्ड कपलाई पहिलाभन्दा अधिक रणनीतिक र रोमाञ्चक बनाएको छ। ठूलो टीमहरूले शुरुवातमा सजिलो प्रतिद्वन्द्वीहरू पाए पनि नक्आउट चरणमा हाई भोल्टेज म्याचहरू देख्न पाइनेछ। विशेषगरी पट ४-मा इटली जस्ता टीमको उपस्थितिले टुर्नामेण्टलाई रोचक बनाउनेछ।