मुम्बई: पृथ्वी शा-लाई एक समय भारतीय क्रिकेटका सबैभन्दा उदीयमान नक्षत्रहरूमा एक मानिन्थ्यो तर मैदान भित्र अनि बाहिर विवादले गर्दा उनी अहिले आफ्नो करियरलाई फेरि जीवित गर्ने निर्णायक मोड़मा पुगेका छन्। गत केही सालहरूमा फर्म, फिटनेस र विभिन्न विवादहरूले गर्दा उनको प्रगतिलाई गहिरो चोट लागेको छ। यसबीच उनले २०२५-२६ घरेलु सीजन अघि मुम्बईबाट महाराष्ट्र शिफ्ट भएर आफ्नो करियरलाई नयाँ दिशा दिने बाटो चयन गरे। अहिले उनी सैयद मुश्ताक अली ट्रफी घरेलु टी२० प्रतियोगितालाई मञ्च बनाएर आफ्नो उपयोगिता साबित गर्न चाहन्छन्। मुम्बई छोड़ेर महाराष्ट्रलाई चयन गर्ने फसेलाले उनी एउटा असल शुरुवात र अवसरको खोजमा रहेको स्पष्ट हुन्छ। सैयद मुश्ताक अली ट्रफी बुधवारदेखि शुरु भइसकेको छ अनि यस टुर्नामेण्टले उनको करियरलाई नयाँ दिशा दिन सक्छ। टुर्नामेण्टमा पृथ्वीले महाराष्ट्रको टीमको कप्तानी पनि गर्नेछन्। रुतुराज गायकवाड़ राष्ट्रिय टीममा रहेका हुनाले ग्रुप चरणमा पृथ्वीले नै महाराष्ट्रको टीमको कप्तानी गर्नेछन्। यस टुर्नामेण्टमा असल प्रदर्शन गरेर पृथ्वी आईपीएल २०२६-को निम्ति हुने मिनी लिलामीको निम्ति मजबूत मञ्च तयार गर्न चाहन्छन्। आईपीएलको गत लिलामीमा उनको नाममा कुनै पनि टीमले बोली लगाएको थिएन। पृथ्वीले आईपीएलमा सातैवटा सीजन दिल्ली क्यापिटल्सबाट खेलेका छन्। उनले दिल्ली फ्रेञ्चाइजीको निम्ति १४७-को स्ट्राईक रेटले १८९२ रन बनाएका छन्। पावरप्ले-मा टीमलाई तेज शुरुवात दिलाउने उनको क्षमतालाई अहिले पनि नकार्न सकिँदैन। अहिले उनी पुरानो फर्ममा फर्किन सके आईपीएल २०२६ अघि उनको क्रिकेट करियरले फेरि नयाँ उड़ान हासिल गर्न सक्नेछ। केवल १८ सालको उमेरमा टेस्ट पदार्पण अनि पहिलो ईनिंग्समै शतक बनाउने पृथ्वीमा प्रतिभाको कुनै कमी छैन। उनलाई अहिले केवल सही मानसिकता र मञ्चको आवश्यकता छ, जुन सैयद मुश्ताक अली ट्रफीले प्रदान गर्नेछ।