गोवा: गोवामा ५६औँ इन्टरनेशनल फिल्म फेस्टिभल अफ इंडिया (आईएफएफआई) २०२५ एक भव्य र रंगारंग समारोहका साथ शुरु भएको छ।
गोवाकाे राजधानी पंजिममा आयोजित उद्घाटन कार्यक्रममा देशका विभिन्न सांस्कृतिक पहिचान झल्काउने आकर्षक झाँकी र प्रस्तुति देखाइए।
यसपटक समारोहको उद्घाटन अनौठो तर प्रभावशाली ढंगले गरिएको छ। गोवाका राज्यपाल पुसापति अशोक गजपति राजू र मुख्यमन्त्री डाक्टर प्रमोद सावन्तले तुलसीको बिरुवामा पानी हालेर फेस्टिभलको सुरुवात गरे, जसले वातावरणीय दिगोपनाको सन्देश दिएको आयोजकहरूले बताए।
उद्घाटन समारोहमा गरिएको कार्निभल–शैलीको परेड विशेष आकर्षण बन्यो। विभिन्न प्रोडक्शन हाउसले भारतीय सिनेमाबाट प्रेरित झाँकी प्रस्तुत गरे।
नेशनल फ़िल्म डेवलपमेंट कॉर्पोरेशन (एनएफडीसी)ले आफ्नो ५० वर्षको यात्रालाई स्मरण गर्दै जाने भी दो यारों, द लन्चबक्स लगायतका चर्चित फिल्मका पोस्टरसमेत राखिएको झाँकी प्रदर्शन गर्‍यो। महावतार नरसिम्हालाई समर्पित कलात्मक झाँकीले पनि दर्शकको प्रशंसा पायो।
कार्यक्रमलाई सम्बोधन गर्दै मुख्यमन्त्री सावन्तले गोवाको उदीयमान फिल्म डेस्टिनेशनका रुपमा बढ्दो भूमिकामाथि जोड दिए। उनले राज्यको विश्वस्तरीय पूर्वाधार, पर्यटन क्षेत्र र फिल्ममेकर्सलाई सहयोग गर्ने नीतिहरूले गोवाको छवि अन्तर्राष्ट्रिय रूपमा मजबुत बनाएको बताए।
राज्यपाल राजूले भने, यो वर्ष ८४ देशका २७० फिल्म प्रदर्शन हुने उल्लेख गर्दै आईएफएफआईले विश्व सिनेमाको विविधता र उदीयमान प्रतिभालाई एउटै मञ्चमा ल्याउने काम गरेको बताए। उनले आईएफएफआईलाई गोवामा स्थायी रूपमा स्थापित गर्नेतर्फ पूर्व मुख्यमन्त्री दिवंगत मनोहर पर्रिकरको योगदान स्मरण गरे।
उद्घाटन कार्यक्रममा बर्लिन फिल्म फेस्टिभल २०२५मा ग्रान्ड जुरी पुरस्कार जितेको ब्राजिलियन फिल्म ‘द ब्लू ट्रेल’ को पनि पहिलो प्रदर्शन गरियो।
आईएफएफआई २०२५ आगामी नोभेम्बर २८ सम्म चल्नेछ, भने वेभ्स फिल्म बजार २४ नोभेम्बरसम्म सञ्चालन हुनेछ।