काठमाडौं: नेपाल प्रिमियर लिग (एनपिएल) को दोस्रो खेलमा चितवन राइनोजले जित हासिल गरेको छ। मंगलबार कीर्तिपुरस्थित त्रिवि क्रिकेट रंगशालामा भएको खेलमा चितवनले कर्णाली याक्सलाई ४ विकेटले पराजित गरेको छ। कर्णालीले दिएको १६७ रनको लक्ष्य चितवनले १९ ओभरमा ६ विकेट गुमाउँदै पूरा गरेको छ। चितवनका लागि रवि बोपाराले अर्धशतक बनाए। उनले ३६ बलमा ३ चौका र ३ छक्कासहित ५२ रन बनाए। सेफ जबले ३८ रन जोडे। ओपनर दीपक बोहराले ४२ रन बनाए। ओपनर डेभिड मलान ६ रनमा आउट भए। देव खनाल २ रनमा रनआउट भए। कप्तान कुशल मल्लले २० रन जोडे। कर्णालीका लागि कप्तान सोमपाल कामीले दुई विकेट लिए भने युनिश सिंह र युवराज खत्रीले एक-एक विकेट लिए।