आईसीटीलाई “नक्कली अदालत” भनी

ढाका: बंगलादेशकी अपदस्थ प्रधानमन्त्री शेख हसिनाले अन्तर्राष्ट्रिय अपराध न्यायाधिकरण (आईसीएलटी) द्वारा सुनाइएको मृत्युदण्डलाई राजनीतिक प्रतिशोधको कार्यको रूपमा वर्णन गरेकी छिन्। उनले यसलाई “नक्कली अदालतको निर्णय” भनेकी छिन्। हसिनाले भनिन् उनको अनुपस्थितिमा मुद्दा चलाइएको थियो र उनलाई आफ्नो बचाउ गर्ने कुनै अवसर दिइएको थिएन।
बंगलादेशको अन्तर्राष्ट्रिय अपराध न्यायाधिकरणले शेख हसिनालाई मानवता विरुद्धको अपराधको दोषी पाएको छ। बंगलादेशकी अपदस्थ प्रधानमन्त्री शेख हसिनाले अन्तर्राष्ट्रिय अपराध न्यायाधिकरण (आईसीएलटी) द्वारा सुनाइएको मृत्युदण्डलाई “पूर्ण रूपमा पक्षपाती, राजनीतिक रूपमा प्रेरित र गैरकानूनी” भनेकी छिन्। सजाय घोषणा भएपछि नयाँ दिल्लीबाट एक समाचार च्यानलसँगको आफ्नो पहिलो अन्तर्वार्तामा, ७८ वर्षीया शेख हसिनाले भनिन् यो फैसला “नक्कली र तथाकथित अदालत” बाट आएको हो जसको कुनै जनादेश छैन।
शेख हसिना अगस्ट ५, २०२४ देखि भारतमा शरण लिइरहेकी छिन्। अन्तर्राष्ट्रिय अपराध न्यायाधिकरणले उनलाई गत वर्षको हिंसात्मक विद्यार्थी विरोध प्रदर्शनको क्रममा मानवता विरुद्धको अपराधको दोषी ठहर गरेको थियो। फैसलाप्रति प्रतिक्रिया दिँदै हसिनाले भनिन्, “ममाथि लगाइएका आरोपहरूलाई स्पष्ट रूपमा अस्वीकार गर्छु। यो मुद्दा मेरो अनुपस्थितिमा सञ्चालन गरिएको थियो, र मलाई न त आफ्नो बचाउ गर्ने अवसर दिइयो न त मलाई मेरो रोजाइको वकिल राख्न अनुमति दिइयो।”
उनले थपिन्, “आईसीटीको बारेमा अन्तर्राष्ट्रिय केही छैन। यो न्यायाधिकरणले विपक्षी दलहरूले गरेको हिंसालाई पूर्ण रूपमा बेवास्ता गर्दै अवामी लिगका सदस्यहरूलाई मात्र लक्षित गरिरहेको छ।” हसिनाले थपिन्, “संसारका कुनै पनि सम्मानित र व्यावसायिक कानूनविद्ले बंगलादेशको यो आईसीटीलाई मान्यता दिने छैनन्। यसको उद्देश्य बंगलादेशको अन्तिम निर्वाचित प्रधानमन्त्रीलाई सत्ताबाट हटाउनु र अवामी लिगलाई राजनीतिक रूपमा नष्ट गर्नु हो।”