नयाँ दिल्ली: आईपीएल २०२६-को निम्ति १६ दिसम्बरमा अबु धाबीमा हुने खेलाड़ीहरूका लिलामी अघि राजस्थान रोयल्सले श्रीलंकाका पूर्व कप्तान कुमार संगकारालाई टीमको मुख्य प्रशिक्षक नियुक्त गरेको छ। संगकाराले राहुल द्रविड़को स्थान लिनेछन्, जसले आईपीएल २०२५ को केही समय पछि आफ्नो पद छोड़ेका थिए। संगकारा २०२१-देखि फ्रेञ्चाइजीका क्रिकेट निदेश हुन् अनि उनले अब द्रविड़को स्थानमा मुख्य प्रशिक्षकको जिम्मेवारी सम्हाल्नेछन्। संगकारा २०२१-देखि २०२४-सम्म टीमका मुख्य प्रशिक्षक रहिसकेका छन् अनि अब एकपल्ट फेरि जिम्मेवारीको निम्ति तयार छन्। राजस्थान रोयल्सले एउटा सोशल मीडिया पोस्टमा क्रिकेट निदेशक कुमार संगकाराले आईपीएल २०२६-मा टीमका मुख्य प्रशिक्षकको जिम्मेवारी निर्वाह गर्ने बताएको छ। आईपीएलको गत सीजनमा राजस्थान रोयल्सको प्रदर्शन खराब रहेको थियो। टीमले १४ वटा लीग म्याचमा केवल ४ वटा जीतको साथ १० वटा टीमको सूचीमा नवौं स्थान हासिल गरेको थियो। राजस्थान रोयल्सले गत सीजनसम्म टीमका कप्तान रहने सञ्जु सेमसनलाई चेन्नई सुपर किंग्ससँग ट्रेड गरेको छ। यसको बद्ली टीमले रविन्द्र जडेजा र सेम कुरेनलाई टीममा सामेल गरेको छ। संगकाराको नियुक्तिको घोषणा रिटेन्शनको लगत्तै पछि गरियो। रोयल्सले आईपीएल २०२६ अघि आफ्नो ७ जना खेलाड़ीलाई रिलीज गरेको छ, जसमा ३ जना विदेशी खेलाड़ी पनि रहेका छन्।