रावलपिण्डी: पाकिस्तानले शुक्रवार खेलिएको दोस्रो वनडे इण्टरनेशनल क्रिकेट म्याचमा श्रीलंकालाई ८ विकेटले पराजित गरी ३ वटा म्याचको सीरीजमा २-०-को अजेय बढ़त हासिल गऱ्यो। पाकिस्तानका पूर्व कप्तान बाबर आजमले टीमलाई जीत दिलाउनमा महत्त्वपूर्ण भूमिका निर्वाह गर्दै अविजित १०२ रन बनाए, जुन उनको २ वर्षभन्दा अधिक समयपछि पहिलो इण्टरनेशनल शतक हो। यसअघि बाबरले अन्तिमपल्ट मई २०२३-मा एशिया कपको म्याचमा नेपालविरुद्ध शतक बनाएका थिए। पाकिस्तानका यस ३१ वर्षीय ब्याटरले श्रीलंकाविरुद्ध शतकको साथ फर्म हासिल गरे। यो बाबरको वनडे इण्टरनेशनल प्रारूपमा २०औं शतक हो। यसको साथै उनी पाकिस्तानको निम्ति यस प्रारूपमा संयुक्त रूपले सर्वाधिक शतक बनाउने ब्याटर बने। सईद अनवरले पनि वनडेमा २० वटा शतक बनाएका थिए। रावलपिण्डी क्रिकेट स्टेडियममा टस हारेर पहिला ब्याटिंग गर्दै श्रीलंकाले ५० ओभरमा ८ विकेट गुमाएर २८८ रन बनायो। जनिथ लियांगेले सर्वाधिक ५४ रन बनाए। यसबाहेक कामिण्डु मेण्डिसले ४४, सदीरा समराविक्रमाले ४२ र वानिन्दु हसारंगाले अविजित ३७ रन बनाए। पाकिस्तानका बलरहरूमा हारिस रऊफ र अबरार अहमदले ३-३ विकेट लिए। त्यसपछि पाकिस्तानले ४८.२ ओभरमा २ विकेटमा २८९ रन बनाएर म्याच जित्यो। बाबरले आफ्नो शतकीय ईनिंग्समा ११९ बल खेलेर ८ वटा चौका लगाए। यसबाहेक ओपनर फखर जमानले ७८ र मोहम्मद रिजवानले अविजित ५१ रन बनाए। बाबरले जमानसँग दोस्रो विकेटको निम्ति १०० रन अनि रिजवानसँग तेस्रो विकेटको निम्ति ११२ रनको अटूट पार्टनरशीप गरे। सीरीजको तेस्रो तथा अन्तिम म्याच आइतवार खेलिनेछ।