लण्डन: यूएफा च्याम्पियन्स लीग फूटबल प्रतियोगितामा बायर्न म्यूनिख र आर्सनलले लगातार जीतको क्रम जारी राख्यो। यसरी बायर्न म्यूनिख र एट्लेटिको म्याड्रिडले पनि आ-आफ्नो म्याच जित्यो। मंगलवार राति खेलिएको चरम रोमाञ्चक म्याचमा लिभरपूलले रियल म्याड्रिडविरुद्ध १-०-ले जीत हासिल गऱ्यो। आफ्नो होम ग्राउण्ड एनफील्डमा ४३ प्रतिशत पोजेशनको साथ खेल्ने लिभरपूललाई रियल म्याड्रिडले कड़ा चुनौती दियो। अन्तमा एलेक्सिस म्याक-एलिस्टरले ६१औं मिनटमा दिलाएको गोलले लिभरपूललाई जीत दिलायो। यस हारको साथ रियल म्याड्रिडको लगातार ३ वटा म्याचमा जीतको क्रममा पनि विराम लाग्यो। रियल म्याड्रिड र लिभरपूलसँग अहिले ४-४ वटा म्याचमा ९-९ पोइण्ट्स रहेको छ तर गोल अन्तरको आधारमा अहिले यी दुई क्लब पोइण्ट्स टेबलमा क्रमशः पाँचौं र छैटौं स्थानमा रहेको छ। यसरी बायर्न म्यूनिखले फ्रान्सीसी क्लब पेरिस सेण्ट जर्मेन (पीएसजी)-लाई २-१-ले पराजित गऱ्यो। यस अवे म्याचमा ३५ प्रतिशत पोजेशनको साथ खेल्ने जर्मनीको क्लबलाई लुईस डियाजको उत्कृष्ट प्रदर्शनले जीत दिलायो। डियाजले म्याचको चौथो र ३२औं मिनटमा गोल गरे। डियाजको प्रदर्शन पहिलो हाफसम्म नै सीमित रह्यो कारण उनले इञ्ज्युरी टाइमको सातौं मिनटमा रेड कार्ड देखेर मैदान छोड़नु पऱ्यो। यसरी पीएसजी-को तर्फबाट जोआओ नेवेसले ७४औं मिनटमा गोल गरे। यस जीतपछि बायर्न १२ पोइण्ट्सको साथ गोल अन्तरको आधारमा शीर्ष स्थानमा रहन पुग्यो। यसरी पीएसजी ९ पोइण्ट्सको साथ दोस्रो स्थानमा रहेको छ। आर्सनलले पनि चेक रिपब्लिकको क्लब स्लाविया प्राहालाई ३-०-ले सजिलै पराजित गऱ्यो। यस अवे म्याचमा ६० प्रतिशत पोजेशनको साथ खेल्ने प्रीमियर लीग क्लबको निम्ति मिकेल मेरिनोले ४६औं र ६८औं मिनटमा २ गोल गरे। यसरी अन्य एउटा गोल बुकायो साकाले ३२औं मिनटमा गरे। यस जीतपछि आर्सनल १२ पोइण्ट्सको साथ गोल अन्तरको आधारमा दोस्रो स्थानमा रह्यो।

प्रीमियर लीगको क्लब टोटनह्यामले पनि डेनमार्कको क्लब एफसी कोपेनहेगनलाई ४-०-ले पिट्यो। आफ्नो होम ग्राउण्डमा ६० प्रतिशत पोजेशनको साथ खेल्ने टोटनह्यामको तर्फबाट ब्रेनान जनसनले १९औं, विल्सन ओडोबर्टले ५१औं, मिकी वान डे वेनले ६४औं र जोआओ पालहिन्हाले ६७औं मिनटमा गोल गरे। म्याच जिते पनि टोटनह्यामका फरवर्ड ब्रेनान जनसनलाई ५७औं मिनटमा रेड कार्ड देखाइयो। यस जीतको साथ टोटनह्याम ८ पोइण्ट्सको साथ सातौं स्थानमा पुग्यो। एट्लेटिको म्याड्रिडलाई पनि बेल्जियमको क्लब यूनियन सेण्ट-गिलोइसविरुद्ध ३-१-ले जीत हासिल गर्न कुनै समस्या भएन। आफ्नो होम ग्राउण्डमा ६२ प्रतिशत पोजेशनको साथ खेल्ने ला लीगाको क्लबबाट जूलियन अल्वारेजले ३९औं, कोनर गालाघेरले ७२औं र मार्कोस लोरेण्टेले इञ्ज्युरी टाइमको छैटौं मिनटमा गोल गरे। यसरी ब्रूसेल्सको टीमबाट रोस साइकिसले ८०औं मिनटमा गोल गरे। यस जीतको साथ एट्लेटिको म्याड्रिड ६ पोइण्ट्सको साथ १४औं स्थानमा रहन पुग्यो। इटलीको क्लब युभेण्टस र पोर्तुगलको टीम स्पोर्टिंग लिस्बनबीच खेलिएको म्याच १-१-ले ड्र रह्यो। स्पोर्टिंग लिस्बनको निम्ति मेक्सीमिलियानो अराउजोले १२औं मिनट र युभेण्टसको तर्फबाट डुसान भ्लाहोविचले ३४औं मिनटमा गोल गरे। यस ड्र पछि युभेण्टस ३ पोइण्ट्सको साथ २३औं स्थानमा रह्यो अनि टीमले टुर्नामेण्टको यस सीजनमा एउटा पनि म्याच जितेको छैन। यसरी दशौं स्थानमा रहने स्पोर्टिंग लिस्बनसँग ७ पोइण्ट्स रहेको छ। अन्य म्याचहरूमा मोनाकोले बोडो ग्लिम्ट एफसीलाई १-०-ले पराजित गऱ्यो भने पीएसभी र ओलम्पियाकोस बीच को म्याच १-१-ले ड्र रह्यो। नापोली र एण्ट्रेक्ट फ्रांकफर्टबीच खेलिएको म्याच गोलरहित (०-०) ड्र मा समाप्त भयो।