कोलकाता: पश्चिम बङ्गालमा एसआईआर मुद्दालाई लिएर राजनीतिक हलचल बीच मुख्यमन्त्री ममता बनर्जीका प्रमुख आर्थिक सल्लाहकार तथा पूर्व अर्थमन्त्री डा. अमित मित्रा ले सिस्टर निवेदिताको जयन्तीका अवसरमा भारतीय जनता पार्टी (भाजपा) लाई तीव्र रूपमा आलोचना गरेका छन्।
डा. मित्राले बिहीबार एक्स (पूर्व ट्विटर) मा लेखे, “१२२ वर्षअघि सिस्टर निवेदिताले भनेकी थिइन्, भारतलाई एउटा महान राष्ट्रिय भावनाबाट हेर्नुपर्छ, जहाँ हिन्दू र मुस्लिम एकअर्काप्रति सम्मान र प्रेम प्रकट गर्छन्।”
उनका अनुसार आज यही वाणी ती शक्तिहरूलाई चुनौती दिँदैछ, जसले घृणा र विभाजनको राजनीति मार्फत समाजमा दरार ल्याउन खोजिरहेका छन्।
डा. मित्राले भाजपा माथि आरोप लगाउँदै भने, “महान चिन्तकका विचारहरूलाई तोडमोड गरी राजनीतिक फाइदा लिन खोजिँदैछ। धर्म र अध्यात्मलाई असली आदर्शको विपरीत अर्थमा प्रस्तुत गरिँदैछ।”
उनले जोड दिए, “यो देश सबैको हो। धर्म होइन, मानवता नै भारतको साँचो पहिचान हो।”
राजनीतिक विश्लेषकहरूका अनुसार मित्राको यो भनाइले तृणमूल कङ्ग्रेसको वैचारिक दिशालाई स्पष्ट पार्छ- भारतको आत्मा विभाजनमा होइन, एकतामा बस्छ।