लण्डन: ईंग्लिश प्रीमियर लीग फूटबलमा आर्सनलले आफ्नो उत्कृष्ट प्रदर्शनको क्रम जारी राख्यो भने टोटनह्यामले पनि जीतको फर्म हासिल गऱ्यो। यसबीच म्यानचेष्टर सिटीले चाहिँ निराशाजनक हारको सामना गर्नु पऱ्यो। आइतवार राति खेलिएको म्याचमा आर्सनलले क्रिस्टल प्यालेसविरुद्ध १-०-ले जीत हासिल गऱ्यो। आफ्नो होम ग्राउण्ड एमिरेट्स स्टेडियममा ६० प्रतिशत पोजेशनको साथ खेल्ने आर्सनलको निम्ति एबेरेची एजे-ले ३९औं मिनटमा गोल गरे। यस जीतको साथ आर्सनल ९ वटा म्याचमा २२ पोइण्ट्सको साथ प्रीमियर लीग पोइण्ट्स टेबलको शीर्ष स्थानमा कायम रह्यो। यसरी दशौं स्थानमा रहने क्रिस्टल प्यालेससँग १३ पोइण्ट्स रहेको छ। यसबीच म्यानचेष्टर सिटीले चाहिँ एस्टन भिल्लाविरुद्ध ०-१-ले हारको सामना गर्नु पऱ्यो। प्रीमियर लीगको जारी सीजनमा यो सिटीको तेस्रो हार हो। यस अवे म्याचमा ५३ प्रतिशत पोजेशनको साथ खेल्दै १५ पल्ट विपक्षी पोस्टमा हमला गरे पनि सिटीले गोल गर्न सकेन। एस्टन भिल्लाको तर्फबाट म्याचको एकमात्र गोल मेटी क्याशले १९औं मिनटमा गरे। यस जीतको साथ एस्टन भिल्ला १५ पोइण्ट्सको साथ आठौं स्थानमा पुग्यो। यसरी पाँचौं स्थानमा रहने म्यानचेष्टर सिटीसँग १६ पोइण्ट्स रहेको छ।
टोटनह्यामले गत म्याचको हारलाई भुलेर एभर्टनविरुद्ध ३-०-ले जीत हासिल गऱ्यो। यस अवे म्याचमा ४७ प्रतिशत पोजेशनको साथ खेल्ने टोटनह्यामको निम्ति मिकी वान डे वेनले २ गोल गरे। उनले १९औं मिनट र मध्यान्तर अघि इञ्ज्युरी टाइमको छैटौं मिनटमा गोल गरे। अन्य एउटा गोल पापे माटर सारले ८९औं मिनटमा गरे। यस जीतपछि टोटनह्याम १७ पोइण्ट्सको साथ गोल अन्तरको आधारमा तेस्रो स्थानमा पुग्यो। यसबीच बोर्नमाउथले आफ्नो असाधारण प्रदर्शनको क्रम जारी राख्दै नटिंघम फरेष्टविरुद्ध २-०-ले जीत हासिल गऱ्यो। होम टीमबाट मार्कस तावेरनिएरले २५औं र एली जूनियर क्रोपीले ४०औं मिनटमा गोल गरे। यस जीतको साथ बोर्नमाउथ १८ पोइण्ट्सको साथ दोस्रो स्थानमा पुग्यो। अन्य एउटा म्याचमा बर्नलीले वूल्भ्सलाई ३-२-ले पराजित गऱ्यो।