सिलीगढी: उत्तरबंग गौड़ ब्राह्मण महासभा द्वारा सिलीगुड़ीस्थित ऋषि भवनमा आयोजित दीपावली मिलन समारोह २०२५ अत्यन्त हर्षोल्लास, भव्यता र सांस्कृतिक गरिमासहित सम्पन्न भएको छ।
समारोहमा समाजका सैकड़ों सदस्य, वरिष्ठजन, ट्रस्टी, महिलाहरू, युवा तथा गणमान्य अतिथिको उपस्थिति रहेको थियो। कार्यक्रमले समाजको एकता, संस्कृति र सेवा भावलाई बलियो सन्देश दिएको आयोजकहरूले बताएका छन्।
कार्यक्रमको शुभारम्भ वैदिक मंगलाचरण र दीप प्रज्वलनसहित भएको थियो। बाल कलाकार, महिला मंडल र गायक कलाकारहरूले आफ्नो प्रस्तुतीमार्फत उपस्थित जनसमूहलाई मन्त्रमुग्ध बनाएका थिए। सांस्कृतिक कार्यक्रमहरूको विविधता र जोशले वातावरणलाई उत्सवी बनाएको आयोजकहरूले जानकारी दिएका छन्।

यस अवसरमा पंडित श्री सुरेश चहड़िया (सिक्किमका राजगुरु) मुख्य अतिथि तथा श्री प्रकाश शर्मा (‘इलायचीवाले’) सम्माननीय अतिथि रहेका थिए। दुवैले समाजमा एकता, सेवा र संस्कृतिको संरक्षण सम्बन्धी प्रेरक विचार व्यक्त गरेका थिए।
मुख्य अतिथि पंडित सुरेश चहड़ियाले गौशाला निर्माणमा सहयोगको उदार घोषणा गर्दै भने, “एकता, सेवा र सहयोग नै समाजको सच्चा शक्ति हुन्; जब हामी संगठित हुन्छौँ, कुनै लक्ष्य असम्भव हुँदैन।”
महासभाका वरिष्ठ सदस्यहरू श्री राधेश्याम शर्मा, श्री तुहीराम शर्मा, श्री प्रेम शर्मा (अध्यक्ष, ऋषि भवन) र श्री अभिषेक शर्मा (उपाध्यक्ष)ले समाजको विकास, शिक्षा र सांस्कृतिक उत्थानमा आफ्नो दृष्टिकोण प्रस्तुत गरे।
महासभाका सचिव श्री मनोज शर्मा गौड़ले सबै अतिथिहरू, ट्रस्टीहरू, कार्यकर्ता र स्वयंसेवकप्रति आभार व्यक्त गर्दै भने, “यो दीपावली मिलन केवल उत्सव होइन, हाम्रो संस्कृति, एकता र सेवा भावको प्रतीक हो। उत्तरबंग गौड़ ब्राह्मण सेवा ट्रस्ट आधिकारिक रूपमा दर्ता भइसकेको छ, र गुरुकुल स्थापना, गौशाला निर्माण तथा असहाय बालबालिकाको शिक्षा सहयोग हाम्रो मुख्य उद्देश्य हुनेछ।”

कार्यक्रममा भजन सम्राट अजय शर्माले आफ्नो मधुर भजनमार्फत वातावरण भक्तिमय बनाएका थिए भने दीपक शर्माले कार्यक्रमको गति र अनुशासन सुनिश्चित गरेका थिए। स्वागत, अतिथि अभिनंदन र मंच संचालन पूर्ण समन्वयमा सम्पन्न भएको थियो।
कार्यक्रमको आकर्षणको रूपमा लकी ड्रॉ प्रतियोगिता रहेको थियो, जसमा विजेताहरूलाई चाँदीका उपहार प्रदान गरियो।
समापन सत्रमा महासभाका पदाधिकारीहरूले आउँदो वर्षमा कार्यक्रम अझ भव्य र प्रेरणादायी बनाउने संकल्प गरे। सबै ट्रस्टी र सदस्यहरूले समाजको संस्कृति, परम्परा र सेवा भावलाई नयाँ पुस्तासम्म पुर्‍याउने प्रतिज्ञा गरे।