एंटानानारिवो: मेडागास्करका राष्ट्रपति एंड्री राजोइलिनाले भनेका छन् कि सैन्य विद्रोह र बढ्दो प्रदर्शनका कारण उनी जोखिममा थिए, त्यसैले देश छोड्नुपर्यो।
राष्ट्रपति राजोइलिनाले सोमबार राति कुनै अज्ञात स्थानबाट राष्ट्रिय टेलिभिजनमा देशबासीलाई सम्बोधन गरे, तर उनले राजीनामाको घोषणा भने गरेनन्।
देशमा केही हप्तादेखि ‘जेन जेड’ नेतृत्वमा सरकारविरोधी प्रदर्शन जारी थिए। अवस्था गम्भीर तब बन्यो जब शनिबार एक विशेष सैन्य इकाइले प्रदर्शनमा भाग लियो र राष्ट्रपति तथा मन्त्रीहरूलाई पद छोड्न आग्रह गर्यो। राजोइलिनाले यसलाई सत्ता कब्जाको अवैध प्रयास भने।
राष्ट्रपतिले भने, “म आफ्नो जीवनको सुरक्षा गर्न सुरक्षित स्थानमा जान बाध्य भएँ।” उनले संविधानको सम्मान र संवादको आव्हान गरे, तर देश कसरी छोडे र कहाँ गए भन्ने खुलाएनन्। एक रिपोर्ट अनुसार उनलाई फ्रान्सको सैन्य विमानमार्फत देश बाहिर लगिएको दाबी गरिएको छ।
मेडागास्कर फ्रान्सको पूर्व उपनिवेश हो र राजोइलिनासँग कथित रूपमा फ्रान्सेली नागरिकता पनि छ। विरोध प्रदर्शन २५ सेप्टेम्बरमा पानी र बिजुलीको कटौतीको विरोधमा सुरु भएका थिए।