काठमाडौं: पूर्वराजा ज्ञानेन्द्र शाह पोखरामा एक साता बिताएपछि काठमाडौं फर्किएसँगै उनको स्वागतका लागि राजवादी समूह र दलले प्रदर्शन गर्ने योजना बनाएका छन्। यसैलाई मध्यनजर गर्दै काठमाडौंमा सुरक्षाकर्मीलाई उच्च सतर्कतामा राखिएको छ।
नारायणहिटी दरबार सङ्ग्रहालय, त्रिभुवन अन्तर्राष्ट्रिय विमानस्थललगायतका संवेदनशील स्थानमा आज बिहानैदेखि सुरक्षाकर्मी परिचालन गरिएको छ।
सुरक्षा बल तयार, रणनीति बलियो:
काठमाडौं उपत्यका प्रहरी कार्यालय रानीपोखरीका प्रमुख डीआईजी टेक तामाङले सम्भावित भीडभाड र जुलुस नियन्त्रण बाहिर जाने सम्भावनालाई ध्यानमा राखेर आवश्यक सुरक्षा रणनीति तयार पारिएको बताए।
उनले भने, ‘जस्तो अवस्था आए पनि त्यसको सामना गर्न हामी पूर्ण रुपमा तयार छौं ।
स्रोतका अनुसार पूर्वराजा ज्ञानेन्द्र शाह दिउँसो पोखराबाट काठमाडौं आउने कार्यक्रम छ। उनको स्वागतका लागि राजवादी समर्थकहरुले त्रिभुवन अन्तर्राष्ट्रिय विमानस्थलको गेट अगाडि प्रदर्शन गर्ने तयारी गरेका छन्।
जिल्ला सुरक्षा समितिको बैठक
स्थिति नियन्त्रणमा लिन काठमाडौंका प्रमुख जिल्ला अधिकारी ऋषिराम तिवारीको अध्यक्षतामा जिल्ला सुरक्षा समितिको बैठक बसेको थियो। भीड नियन्त्रणबाहिर गएर उपद्रव, अनुशासनहीन, अवाञ्छित र गैरकानुनी गतिविधिमा संलग्न हुन सक्ने बैठकमा मूल्याङ्कन गरिएको थियो। तसर्थ, त्यस्ता अवस्थाहरू रोक्न आवश्यक कदमहरू छलफल गरियो।
चारवटै सुरक्षा निकायलाई आवश्यकता अनुसार सक्रिय गरिने एक अधिकारीले बताए। उनले भने,
‘कुनै पनि अप्रिय घटना नहोस् भन्ने हाम्रो प्राथमिकता हो। स्थिति बिग्रियो भने आवश्यक संख्यामा सुरक्षाकर्मी तैनाथ गरिनेछ।”
काठमाडौंको चोक चोकमा सुरक्षाकर्मी तैनाथ छन्
बैठकले गरेको निर्णयअनुसार आज बिहानैदेखि काठमाडौंका विभिन्न स्थानमा वर्दीधारी प्रहरी र सादा पोशाकमा गुप्तचर निकायका अधिकृतहरू तैनाथ गरिएको छ।
कुनै पनि अप्रिय घटनालाई समयमै रोक्न सकोस् भनेर सुरक्षा निकायले स्थितिलाई नजिकबाट नियालिरहेका छन्।
पूर्वराजा ज्ञानेन्द्र शाहको काठमाडौँ फर्किने अवसरमा राजवादी दल र समूहले गरेको प्रदर्शनलाई मध्यनजर गर्दै काठमाडौंमा सुरक्षा व्यवस्था कडा पारिएको छ। कुनै पनि परिस्थितिसँग जुध्न सुरक्षा निकायहरू सजग छन् भने राजधानीका संवेदनशील क्षेत्रमा प्रहरी गस्ती बढाइएको छ।