मुम्बई: टी२० वर्ल्ड कपको सेमिफाइनल अघि भारतीय टीमले मंगलवार मुम्बईमा अभ्यास सत्रमा हिस्सा लियो। मुख्य नेट सत्रको २ घण्टापछि अभिषेक शर्मा मजबूत मानसिकता र वानखेड़ेसँग जोड़िएको सुखद यादहरूको साथ ब्याटिंग गर्न ओर्लिए। भारतले बिहीवार टुर्नामेण्टको दोस्रो सेमिफाइनलमा ईंग्ल्याण्डको सामना गर्नेछ अनि अभिषेकले एक साल अघि यी प्रतिद्वन्द्वीविरुद्ध वानखेड़ेमा ५४ बलमा १३५ रनको यादगार ईनिंग्स खेलेका थिए। देब्रे हातका यस ब्याटरले जिम्बाब्वेविरुद्ध ५५ रन बनाएर फर्ममा फर्किएको संकेत दिएका थिए तर उनी अहिले पनि आफ्नो सर्वश्रेष्ठ आक्रामक फर्मदेखि निक्कै टाढ़ा रहेका छन्। नेट्समा केही समय बलिंग गरेपछि अभिषेकले ब्याटिंग प्रशिक्षक सितांशु कोटकको देखरेखमा ब्याटिंग अभ्यास शुरु गरे। कोटकले नेट बलरहरूलाई निर्देश दिएपछि अभिषेकले स्पिनरहरूविरुद्ध आफ्नो सत्र शुरु गरे। ब्याटबाट टाढ़ा गइरहेको बलहरूविरुद्ध कमजोरीलाई पार गर्न अफ् स्पिनरहरूद्वारा शुरुवात गरियो। एकजना लेग स्पिनर र पेस बलर अर्शदीप सिंहले पनि अभिषेकलाई बलिंग गरे। अफ् स्पिनरहरूविरुद्ध अभ्यासको निम्ति तिलक वर्माले पनि लामो ब्याटिंग सत्रपछि अभिषेकलाई बलिंग गरे। चन्द्र ग्रहणले गर्दा १ घण्टा ढिलो गरी शुरु गरिएको सत्रमा सबै १५ जना सदस्यले हिस्सा लिए। खेलाड़ीहरू असल मूडमा थिए अनि वर्म अपको अवधि मुख्य प्रशिक्षक गौतम गम्भीरले पनि उनीहरूलाई साथ दिए। यस अवधि प्रशिक्षक गम्भीर र कप्तान सूर्यकुमार यादवले पीचमा पनि विशेष ध्यान दिए, जसमा निक्कै घाँस रहेको छ। म्याचको समयसम्म घाँसलाई कम्ती गरिने सम्भावना छ। अभ्यास सत्रमा अर्शदीपले विशेषगरी आफ्नो यर्करमा ध्यान दिए। स्टार अलराउण्डर हार्दिक पाण्ड्याले अधिकांश समय नै रेञ्ज हिटिंगमा ध्यान दिए अनि लगभग २ घण्टासम्म ब्याटिंग गरे। तिलक र ईशान किशन जस्ता खेलाड़ीहरूले १ घण्टाभन्दा अधिक समयसम्म ब्याटिंग गरे। यी दुईजनाले पेस र स्पिनर दुवैको सामना गरे। तिलकले कुलदीप यादवविरुद्ध स्लग स्वीप अभ्यास गरे अनि वरुण चक्रवर्तीको बललाई सीधा बाउण्ड्री पारी पनि पुऱ्याए। पेस बलर जसप्रीत बुमराहले पनि महत्त्वपूर्ण म्याच अघि पसिना बहाए। भारतले आफ्नो अन्तिम एकादशमा फेरबदल गर्ने सम्भावना कम्ती नै छ।