कोलकाता: राज्यमा एसआईआर प्रक्रिया सम्बन्धी विवाद चलिरहेको अवस्थामा मुख्यमन्त्री ममता बानर्जीले मंगलबार अत्यन्त गम्भीर र सनसनीपूर्ण आरोप लगाइन्। नवन्नमा आयोजित पत्रकार सम्मेलनमा उनले दाबी गरिन् कि भारतीय सेनाको पूर्वी मुख्यालय फोर्ट विलियम (विजय दुर्ग) मा कार्यरत एक सेना अधिकारी आफ्नै कार्यालयबाट बसेर भाजपा (भारतीय जनता पार्टी) का लागि काम गरिरहेका छन् र मतदाता सूचीबाट नाम हटाउने प्रक्रियामा संलग्न छन्।
मुख्यमन्त्रीले भनिन्, “मसँग जानकारी छ कि फोर्ट विलियममा एक कमाण्डेन्ट एसआईआर र पार्टी कार्यालयको रूपमा भाजपा का लागि काम गरिरहेका छन्।” यो अभिव्यक्तिपछि राजनीतिक र प्रशासनिक क्षेत्रमा व्यापक हलचल उत्पन्न भएको छ। तथापि, ममता बानर्जीले स्पष्ट गरिन् कि उनी सशस्त्र बलप्रति पूर्ण सम्मान राख्छिन् र सेना जस्तो निष्पक्ष संस्थालाई राजनीति बाट टाढा राखिनु पर्छ। सम्बन्धित अधिकारीहरूसँग अपिल गर्दै उनले भनिन्, “म हात जोडेर अनुरोध गर्दछु—सेनाको पोशाक लगाएर कोही पनि राजनीतिक पक्षपात नगर्न।”
मुख्यमन्त्रीले थप आरोप लगाइन् कि केन्द्र सरकारका एजेन्सीहरूको प्रयोग गरेर चुनिन्दा मतदाताहरूको नाम सूचीबाट हटाउने षड्यन्त्र चलिरहेको छ, जसका कारण सामान्य जनमानसमा ठूलो डरको माहोल सिर्जना भएको छ। उनले दाबी गरिन् कि नोटिस पाएको वा नाम कट्ने आशंकाका कारण अहिलेसम्म ८४ जनाको मृत्यु भइसकेको छ, जसमा ४ आत्महत्या र १७ ब्रेन स्ट्रोकका घटना समावेश छन्। यद्यपि यी सबै आरोपमध्ये फोर्ट विलियमसँग सम्बन्धित विषयलाई विशेष गम्भीर मानिएको छ।
अब सबैको नजर भारतीय सेनाको पूर्वी कमाण्ड वा रक्षा प्रतिष्ठानबाट आउन सक्ने सम्भावित आधिकारिक प्रतिक्रियामा टिकेको छ।