मुम्बई: अजीत अगरकरको अगुवाईमा रहने सीनियर राष्ट्रिय पुरुष चयन समितिले शनिवार न्यूजील्याण्डविरुद्ध जनवरीमा हुने सीरीज र आईसीसी टी२० वर्ल्ड कप २०२६-को निम्ति १५ सदस्यीय भारतीय टीमको घोषणा गऱ्यो। भारतीय क्रिकेट कण्ट्रोल बोर्ड (बीसीसीआई)-को मुख्यालयमा भएको चयन समितिको बैठकमा टीमको चयन गरियो। भारतले २०२४-मा भएको गत संस्करणमा रोहित शर्माको कप्तानीमा दक्षिण अफ्रिकालाई पराजित गरी खिताब जितेको थियो। भारतले टी२० वर्ल्ड कपको निम्ति चयन गरेको टीममा शुभमन गिलले स्थान पाएका छैनन्। गिल अहिलेसम्म टीमका उपकप्तान थिए तर अब यो जिम्मेवारी एकपल्ट फेरि अक्षर पटेलले निर्वाह गर्नेछन्। गिल टी२० प्रारूपमा खराब फर्ममा रहेका छन्। यसरी वर्ल्ड कपको टीममा विकेटकीपर ब्याटर ईशान किशन र रिंकू सिंह फर्किएका छन्। ईशानले भारतको निम्ति अन्तिमपल्ट २८ नोभेम्बर २०२३-मा अष्ट्रेलियाविरुद्ध खेलेका थिए। झारखण्डलाई हालै सैयद मुश्ताक अली ट्रफी टी२० टुर्नामेण्टमा च्याम्पियन बनाउनमा ईशानको महत्त्वपूर्ण योगदान रहेको थियो। उनले फाइनलमा म्याच जिताउने शतक (१०१ रन) बनाएका थिए। इशान टीममा आएपछि जितेश शर्मा चाहिँ बाहिर भएका छन्। यसरी रिंकू एशिया कप च्याम्पियन भारतीय टीमका सदस्य थिए तर उनले अष्ट्रेलिया र दक्षिण अफ्रिकाविरुद्ध टी२० सीरीजको निम्ति मौका पाएका थिएनन्। टीमको घोषणा गर्दै अजीत अगरकरले सञ्जु सेमसनले विकेटकीपरको भूमिका निर्वाह गर्ने बताए। गिल बाहिर भएपछि सेमसनले अभिषेक शर्मासँग ईनिंग्सको शुरुवात गर्ने तय भएको छ।
टी२० वर्ल्ड कप र न्यूजील्याण्डविरुद्ध सीरीजको निम्ति भारतीय टीम यसप्रकार छः
सूर्यकुमार यादव (कप्तान), शिवम दुबे, ईशान किशन (विकेटकीपर), अभिषेक शर्मा, तिलक वर्मा, हार्दिक पाण्ड्या, अक्षर पटेल (उपकप्तान), रिंकू सिंह, जसप्रीत बुमराह, अर्शदीप सिंह, वरुण चक्रवर्ती, कुलदीप यादव, हर्षित राणा, सञ्जु सेमसन (विकेटकीपर) र वाशिंगटन सुन्दर।