सिलिगुडी: सिलिगुडी नगर निगमको नवनिर्मित प्लेटिनम जुबिली भवनको ‘अधिवेशन कक्ष’को निरीक्षण पश्चिम बंगाल सरकारका शहरी विकास तथा नगर मामिला विभागका प्रभारी मन्त्री तथा कोलकाता नगर निगमका मेयर फिरहाद हाकिमले गर्नुभयो।
उहाँले सिलिगुडीले पाएको यो नयाँ भवन आफूलाई निकै मन परेको बताउनुभयो। यसलाई राम्रोसँग सञ्चालन गरिएमा यसको परिणाम पनि राम्रो हुने उहाँले उल्लेख गर्नुभयो। आगामी दिनमा सिलिगुडी नगर निगम अझ उज्ज्वल रूपमा अघि बढ्नेमा उहाँले आशा व्यक्त गर्नुभयो।
नागरिकहरूलाई अझ राम्रो सेवा प्रदान गर्ने सन्दर्भमा उहाँले सिलिगुडी नगर निगमका मेयर गौतम देव तथा उहाँका सहकर्मीहरूलाई आफ्नो तर्फबाट शुभकामना र बधाई दिनुभयो। सिलिगुडी नगर निगमले सर्वसाधारणको हितमा निरन्तर काम गरिरहने विश्वास पनि उहाँले व्यक्त गर्नुभयो। यस अवसरमा सिलिगुडी नगर निगमका अन्य पार्षदहरू पनि उपस्थित थिए।