सिलीगुडी: साहुडांगी हाट पी.के. राय हाई स्कुलका प्रधानाध्यापक प्रदीप चौधरी शिक्षारत्न पुरस्कारबाट सम्मानित भएका छन्। अन्ततः साहुडांगीवासीहरूको लामो समयदेखिको सपना पूरा भएको छ। साहुडांगी हाट पी.के. राय हाई स्कुलका प्रधानाध्यापक श्री प्रदीप चौधरी यस वर्ष शिक्षारत्न पुरस्कारबाट विभूषित भएका हुन्। यो सम्मान केवल एक शिक्षकको मात्र होइन, सम्पूर्ण विद्यालय र क्षेत्रको गर्व हो।
आजको नयाँ स्वरूपमा विकसित भएको साहुडांगी हाट पी.के. राय हाई स्कुलको पछाडि प्रधानाध्यापकको अथक परिश्रम, निष्ठा र माया रहेको छ। प्रधानाध्यापकको जिम्मेवारी सम्हालेको दिनदेखि उहाँले कहिल्यै औपचारिकतामा सीमित काम गर्नुभएन। बरु विद्यार्थीहरूलाई आफ्नै परिवार ठानी दिनको अधिकांश समय विद्यालयको उन्नतिको सपना बुन्दै बिताउनुभयो। विद्यालयको विकासका लागि उहाँ घर–घर गई सहयोगसमेत माग्नुभयो।
दक्षिण बंगालका निवासी भए पनि उत्तर बंगालको यस सीमान्त गाउँका विद्यालय र यहाँका मानिसहरूलाई आफ्नै बनाएर, पछिल्ला पाँच–छ वर्षदेखि उहाँ विद्यालयको विकासका लागि निरन्तर मेहनत गर्दै आउनुभएको छ। त्यसकै परिणामस्वरूप आज साहुडांगी गर्वित र हर्षित भएको छ।
पूर्व विद्यार्थीहरू भन्छन्, “यस्ता गुणी शिक्षकज्यूबाट शिक्षा पाउन पाएकोमा हामी साँच्चै भाग्यमानी छौँ। उहाँलाई प्राप्त यो पुरस्कार केवल उहाँको मात्र होइन, हामी सबैको पुरस्कार हो। उहाँ हाम्रो गर्व र हाम्रो अभिमान हुनुहुन्छ।
साहुडांगीवासीहरूको विश्वास छ कि प्रदीप चौधरी महाशयबाहेक यो पुरस्कारका लागि अरू कोही योग्य हुन सक्दैनथ्यो। त्यसैले आजको यो सफलता सम्पूर्ण क्षेत्रका लागि खुशीको दिन बनेको छ।