नयाँ दिल्ली: ओम बिरला बिहीबार लामो समयपछि लोकसभा को बैठकमा सहभागी भएका छन्। फेब्रुअरी १० पछि उनी पहिलो पटक सदनमा उपस्थित भएका हुन्। उनी सदनमा प्रवेश गर्दा सत्ता पक्षका सांसदहरूले ‘अध्यक्ष जी को जय श्री राम’ र ‘भारत माता की जय’ का नारा लगाएका थिए।
लोकसभाको बजेट अधिवेशनको दोस्रो चरण मार्च ९ देखि सुरु भएको थियो। तर विपक्षले स्पीकरविरुद्ध अविश्वास प्रस्तावको सूचना दिएपछि बिरला फेब्रुअरी १० यता सदनमा आएका थिएनन्। अविश्वास प्रस्तावमाथि करिब १४ घण्टा छलफल भएको थियो र अन्ततः प्रस्ताव अस्वीकृत भएको थियो।
सदनको कार्यवाही सुरु भएपछि के.सी. वेणुगोपाल ले एलपीजीसँग सम्बन्धित विषय उठाउन खोजेका थिए। त्यसपछि स्पीकरले पहिले प्रश्नकाल चल्न दिन आग्रह गरेका थिए। वेणुगोपालले भने ‘जिरो आवर’ मा विपक्षका नेतालाई बोल्ने मौका दिनुपर्ने माग गरेका थिए।
पछि स्पीकर बिरलाले करिब २५ मिनेट सम्बोधन गर्दै संसदमा सबै सदस्यलाई आफ्नो कुरा राख्ने अवसर दिइने र सदनको कार्यवाही नियम तथा प्रक्रियाअनुसार नै सञ्चालन हुने बताए। उनले माइक्रोफोनको बटन स्पीकरको आसनमा नहुने पनि स्पष्ट पारे।
लोकसभा सचिवालयका अनुसार सदनमा माइक्रोफोन नियन्त्रण गर्ने काम एक प्राविधिक टोलीले गर्छ। स्पीकर वा सभापतिको निर्देशन अनुसार मात्रै कुनै सदस्यको माइक खोल्ने वा बन्द गर्ने गरिन्छ। विपक्षले भने पटक–पटक आफू बोल्दा माइक बन्द गरिने आरोप लगाउँदै आएको छ।