कोलकाता: पश्चिम बङ्गालमा फेरि ‘कालबैशाखी’ आँधीको प्रभाव देखिन थालेको छ। मौसम विभागका अनुसार दक्षिण बंगालका विभिन्न जिल्लामा तीव्र हावासहित वर्षा र असिना पर्ने सम्भावना रहेको छ।
सोमबार साँझदेखि नै आकाशमा बाक्लो बादल लागेको छ भने केही क्षेत्रमा हावासहित पानी पर्न थालिसकेको छ। यसका कारण तापक्रम घटेको छ र मानिसहरूले अत्यधिक गर्मीबाट केही राहत पाएका छन्।
मौसम विभागले वीरभूम, हुगली, पूर्व र पश्चिम बर्दवानलगायत जिल्लामा आँधीको सम्भावना रहेको जनाएको छ। यी क्षेत्रमा प्रतिघण्टा ७० किलोमिटरको गतिमा हावा चल्न सक्ने अनुमान गरिएको छ। केही स्थानमा असिना पनि पर्न सक्ने बताइएको छ।
यो मौसमीय गतिविधि बिहीबारसम्म जारी रहने र शुक्रबार फेरि वर्षा बढ्न सक्ने सम्भावना छ। मुर्शिदाबाद, नदिया र उत्तर २४ परगनामा पनि हल्कादेखि मध्यम वर्षाको अनुमान गरिएको छ।
उत्तरी बंगालका जिल्लामा पनि मौसम अस्थिर रहनेछ। दार्जिलिङ, कालिम्पोङ, कूचबिहार, जलपाइगुडी, अलीपुरद्वार, मालदा तथा उत्तर–दक्षिण दिनाजपुर क्षेत्रमा मेघगर्जनसहित वर्षा हुने सम्भावना छ। यहाँ ४० देखि ५० किलोमिटर प्रतिघण्टा गतिमा हावा चल्न सक्ने बताइएको छ।