मोदी र शरिफको पनि वक्तव्य

नयाँ दिल्ली: रुसले दाबी गरेको छ कि युक्रेनले सोमबार राष्ट्रपति भ्लादिमिर पुटिनको आवासमा आक्रमण प्रयास गरेको थियो, यद्यपि युक्रेनका राष्ट्रपति भोलोदिमिर जेलेन्स्कीले रूसी आरोप अस्वीकार गरेका छन्।
यस घटनापछि अमेरिकाका राष्ट्रपति डोनाल्ड ट्रम्पदेखि लिएर भारतका प्रधानमन्त्री नरेन्द्र मोदी र पाकिस्तानका प्रधानमन्त्री शहबाज शरिफसम्मले यसबारे प्रतिक्रिया दिएका छन्।
प्रधानमन्त्री मोदीले पुटिनको आवासलाई निशाना बनाइएका खबरबारे आफू चिन्तित रहेको बताएका छन्।
यता, अमेरिकी राष्ट्रपति डोनाल्ड ट्रम्पले पत्रकारसँग भनेका छन् कि उनी यसबारे ‘अत्यन्तै रिसाएका’ छन्।
रूसका परराष्ट्रमन्त्री सेर्गेइ लावरोभले दाबी गरे कि युक्रेनले रातभर ९१ वटा लामो दूरीका मानवरहित हवाई सवारी (यूएभी) प्रयोग गरेर नोभगोरोड क्षेत्रमा अवस्थित पुटिनको सरकारी आवासमा आक्रमण गरेको थियो।
उनका अनुसार रूसी एयर डिफेन्सले सबै यूएभी अवरोध (इन्टरसेप्ट) गरी नष्ट गर्‍यो र यस घटनामा कुनै जनधनको क्षति भएको खबर छैन।
रूसले अब युक्रेनसँगको शान्ति सम्झौतामाथि पुनर्विचार गर्ने बताएको छ।
यद्यपि, कथित आक्रमणको समयमा राष्ट्रपति पुटिन आवासमै थिए कि थिएनन् भन्ने कुरा स्पष्ट भएको छैन।
युक्रेनी राष्ट्रपति जेलेन्स्कीले रूसी आरोपलाई अस्वीकार गर्दै यसलाई ‘रूसको परिचित झूट’ भनेका छन्। उनका अनुसार यस किसिमका दाबीहरूले युक्रेनमाथि आक्रमण जारी राख्न क्रेमलिनलाई बहाना मात्र दिन्छ।
उनले भने, रूस पहिले नै किभस्थित सरकारी भवनहरूलाई निशाना बनाउँदै आएको छ। एक्समा लेख्दै जेलेन्स्कीले भने, “अब विश्वले चुप लागेर बस्नु हुँदैन। हामी रूसलाई स्थायी शान्ति कायम गर्ने प्रयास कमजोर पार्न दिँदैनौँ।”
अमेरिकी राष्ट्रपति डोनाल्ड ट्रम्पका अनुसार पुटिनले सोमबार बिहान फोनमार्फत उनलाई कथित आक्रमणबारे जानकारी दिएका थिए, जसले उनलाई “रिसाएको” बताए।
समाचार एजेन्सी रोयटर्सका अनुसार ट्रम्पले भने, “उनको घरमाथि आक्रमण गर्ने यो सही समय होइन। मलाई यसबारे राष्ट्रपति पुटिनबाट थाहा भयो, र म अत्यन्तै रिसाएको छु।”
आइतबार फ्लोरिडामा ट्रम्प र युक्रेनी राष्ट्रपति जेलेन्स्कीबीच भेटघाट भएको थियो।
अमेरिकी राष्ट्रपति ट्रम्पले युद्ध अन्त्यका लागि ‘सम्झौतामा पुग्न नजिक’ रहेको दाबी गरेका थिए।
यता, भारतका प्रधानमन्त्री नरेन्द्र मोदीले यस घटनाप्रति ‘गहिरो चिन्ता’ व्यक्त गरेका छन्।
उनले एक्समा लेखे, “रूसी राष्ट्रपति पुटिनको आवासलाई निशाना बनाइएको खबरले हामीलाई निकै चिन्तित बनाएको छ।”
उनका अनुसार, “चालु कूटनीतिक प्रयास नै संघर्ष अन्त्य गर्ने सबैभन्दा प्रभावकारी उपाय हो। सबै पक्षले शान्ति प्रयासमा ध्यान दिनुपर्छ र त्यस्ता कदमबाट जोगिनुपर्छ जसले शान्तिलाई क्षति पुर्‍याउन सक्छ।”
पाकिस्तानका प्रधानमन्त्री शहबाज शरिफले पुटिनको आवासमाथि भएको कथित ड्रोन आक्रमणको निन्दा गरेका छन्।
एक्समा उनले लेखे, “राष्ट्रपति पुटिनको आवासमाथि लक्षित आक्रमणको खबरको पाकिस्तान कडा निन्दा गर्छ।”
शरिफले भने, “यस्ता घटनाले शान्ति, सुरक्षा र स्थिरतामा ठूलो खतरा पैदा गर्छन्, विशेषगरी शान्ति प्रयास जारी रहेको समयमा।”
उनले राष्ट्रपति पुटिन, रूसी सरकार तथा जनताप्रति एकजुटता व्यक्त गर्दै सबै प्रकारका हिंसा र सुरक्षालाई कमजोर पार्ने कार्यको विरोध गर्ने बताए।