ट्रम्पले भने, “अब सुन्दर दिनहरू शुरू हुँदैछन्”

न्यूयोर्क: अमेरिकी राष्ट्रपति डोनाल्ड ट्रम्प र मिस्र, कतार र टर्कीका नेताहरूले गाजामा शान्ति पुनर्स्थापना गर्ने घोषणापत्रमा हस्ताक्षर गरेका छन्। सोमबार मिस्रको शर्म अल-शेखमा आयोजित सम्मेलनमा २० भन्दा बढी देशका नेताहरूको उपस्थितिमा हस्ताक्षर भएको थियो।
यस अवसरमा ट्रम्पले भने, ‘एउटा नयाँ र सुन्दर दिन शुरू हुँदैछ, अब पुनर्निर्माण शुरु हुँदैछ।’ उनले इजरायल र हमास बीच युद्धविराम गराउन सहयोग गर्ने मध्यपूर्वी देशका नेताहरूको प्रशंसा गरे।
यसैबीच, मिस्रका राष्ट्रपति अब्देल फताह अल-सिसीले उक्त दिनलाई ‘ऐतिहासिक’ भने। भारतको तर्फबाट विदेश राज्यमन्त्री कीर्तिवर्धन सिंह सम्मेलनमा उपस्थित थिए।
ट्रम्पको गाजा शान्ति योजनाको पहिलो चरणमा हमासले २० जना जीवित कैदीबन्दीलाई हस्तान्तरण गरेको छ। नेपालका विपिन जोशीसहित ४ जना इजरायली मृतक बन्धकहरूको शव फिर्ता गरेको छ। हमाससँग २८ मृतक बन्धक रहेको जनाइएको छ।