कोलकाता: अन्तर्राष्ट्रिय मातृभाषा दिवसको अवसरमा पश्चिम बंगालकी मुख्यमंत्री ममता बनर्जी ले भाषाशहीदहरूलाई श्रद्धाञ्जली अर्पण गर्दै सबै भाषाको सम्मान र संरक्षणको सन्देश दिइन्।
उहाँले १९५२ मा ढाकाको सडकहरूमा मातृभाषा बाङ्ला जोगाउन प्राण उत्सर्ग गर्ने शहीदहरूलाई सम्झँदै भन्नुभयो, “यो दिवस विश्वका सबै भाषाहरू र भाषासैनिकहरूको सम्मानको दिन हो।”
सामाजिक सञ्जालमा जारी आफ्नो सन्देशमा मुख्यमंत्री ममता बनर्जीले भनेकी छन्, “जसरी हामी रवीन्द्रनाथ ठाकुर, काजी नजरुल इस्लाम, सुकांत भट्टाचार्य र जीवनानंद दास को बाङ्ला भाषाप्रति प्रेम र सम्मान व्यक्त गर्छौं, त्यस्तै सबै भाषाहरू पनि समान रूपमा आदरयोग्य छन्।”
उहाँले उल्लेख गर्नुभयो कि तृणमूल कांग्रेस सत्ता आएको पछाडि राज्यले हिन्दी, संथाली, कुरुख, कुरमाली, नेपाली, उर्दू, राजबंशी, कामतापुरी, पंजाबी र तेलुगु भाषालाई सरकारी मान्यता दिएको छ। साथै विभिन्न भाषाहरूको संरक्षण र प्रवर्धनका लागि हिन्दी अकादमी, राजबंशी भाषा अकादमी, कामतापुरी भाषा अकादमी र संथाली अकादमी जस्ता संस्था स्थापना गरिएको छ।
मुख्यमन्त्री ममता बनर्जीले भनेकी छन्, “राज्य सरकार सुनिश्चित गरिरहेको छ कि विभिन्न भाषिक समुदायका मानिसहरूलाई आफ्नै मातृभाषामा शिक्षाको अवसर प्राप्त होस्। उत्तर बंगाल र जंगलमहलजस्ता क्षेत्रहरूमा यी पहलहरूको विशेष महत्व छ, जहाँ विविध भाषाहरू प्रचलित छन्।”
सन्देशको अन्त्यमा उहाँले स्पष्ट गरिन् कि भविष्यमा कुनै भाषा माथि आक्रमण भएमा सबै मिलेर त्यसको विरोध गर्नुपर्छ। उहाँको भनाइ अनुसार, “सबै भाषाहरू समान रूपमा सम्माननीय छन्।” राजनीतिक विश्लेषकहरूले यो बयानलाई देशमा भाषिक विविधता र बहुलतावादको समर्थनको संकेतको रूपमा व्याख्या गरेका छन्।