दिनहाटा: उत्तरबंग विकास मन्त्री उदयन गुहाले गाउँका महिलाहरूलाई भाजपा नेताहरूलाई झाडूले लखेट्न निर्देशन दिएका छन्। उनले आरोप लगाए कि भाजपा पश्चिम बंगालमा १०० दिनको कामको पैसा बन्द गरिदिएको छ र ग्यासको मूल्य बढाएर महिलाहरूको भान्सामा आगो लगाएको छ। त्यसैले आगामी चुनावमा यदि भाजपा नेताहरू भोट माग्न आए भने, ‘महिलाहरूले घरमा प्रयोग हुने झाडू लिएर बाहिर निस्कनुहोस् र भन्नुहोस् “यदि झाडूको चोटबाट बच्न चाहनुहुन्छ भने, भोटको कुरा नगरी यहाँबाट फर्कनुहोस्।
सिटाई विधानसभा क्षेत्रअन्तर्गत ओकड़ाबाड़ी ग्राम पञ्चायतमा आयोजित तृणमूलको एसआईआर-विरोधी कार्यकर्ता सभामा सम्बोधन गर्दै मन्त्री उदयन गुहाले यस्तो विवादास्पद निर्देशन दिएका हुन्। दिनहाटा–१ ब्लकको ओकड़ाबाड़ीमा बिहीबार तृणमूल कांग्रेसको कार्यकर्ता सभा आयोजना गरिएको थियो।
ओकड़ाबाड़ी हाईस्कूलको मैदानमा आयोजित उक्त सभामा उत्तरबंग विकास मन्त्री उदयन गुहा, सांसद जगदीशचन्द्र बर्मा बसुनिया, विधायक सङ्गीता राय, तृणमूल ब्लक अध्यक्ष सुधांशु राय, जिल्ला परिषद्का कर्माध्यक्ष नुर आलम होसेन तथा श्रमिक संगठनका ब्लक अध्यक्ष सुब्रत बर्मन उपस्थित थिए।
सभामा मन्तव्य दिँदै मन्त्रीले पुनः दोहोर्‍याए कि भाजपा सरकारले १०० दिनको कामको भुक्तानी बन्द गरेको छ र ग्यासको मूल्य वृद्धि गरेर महिलाहरूको दैनिकीलाई कठिन बनाएको छ। त्यसैले यसपटकको चुनावमा भाजपा नेताहरू भोट माग्न आए भने घरका महिलाहरूले झाडू लिएर बाहिर निस्किएर उनीहरूलाई लखेट्नुपर्ने बताए।
मन्त्रीको यस्तो टिप्पणी सार्वजनिक भएसँगै जिल्लाको राजनीतिक वृत्तमा चर्को हलचल मच्चिएको छ। कार्यकर्ता सभामा मन्त्री उदयन गुहासँगै सांसद, विधायक तथा तृणमूल कांग्रेसका विभिन्न तहका नेताहरूले पनि एउटै स्वरमा एसआईआर मुद्दालाई लिएर केन्द्रको भाजपा सरकार र निर्वाचन आयोगमाथि आक्रमण गरे। केन्द्र सरकारले एसआईआरको नाममा बंगालका जनतालाई अपमान गरिरहेको आरोपसमेत उनीहरूले लगाए।