नयाँ दिल्ली: भारतीय जनता पार्टी (भाजपा) ले आज आफ्नो स्थापना दिवस मनाएको छ। सन् १९८० अप्रिल ६ मा पार्टी स्थापना गरिएको थियो।
भाजपाका राष्ट्रिय अध्यक्ष नितिन नवीन ले यस अवसरमा सबै कार्यकर्ता तथा देशवासीलाई शुभकामना दिएका छन्। देशभर पार्टीका तर्फबाट विभिन्न कार्यक्रम आयोजना गरिएका छन्।
यस अवसरमा नितिन नवीन ले आफ्नो ‘एक्स’ खातामार्फत भिडियो सन्देश सार्वजनिक गर्दै विश्वकै सबैभन्दा ठूलो राजनीतिक दलका समर्पित कार्यकर्ताहरूलाई बधाई दिएका छन्। उनले जनसंघ कालदेखि विश्वकै ठूलो पार्टी बन्नेसम्मको यात्रालाई असंख्य कार्यकर्ताहरूको त्याग, तपस्या र बलिदानको परिणाम भएको उल्लेख गरेका छन्।
उनले श्यामा प्रसाद मुखर्जी र दीनदयाल उपाध्याय ले अघि सारेको ‘अन्त्योदय’ को अवधारणालाई स्मरण गर्दै नरेन्द्र मोदी को नेतृत्वमा उक्त सपना व्यवहारमा कार्यान्वयन भइरहेको बताएका छन्।
उनले कार्यकर्ताहरूलाई ‘राष्ट्र पहिलो’ को संकल्प पुनः दोहोर्‍याउँदै ‘विकसित भारत’ निर्माणमा पूर्ण ऊर्जा सहित जुट्न आह्वान गरेका छन्।
स्थापना दिवसका अवसरमा शिवराज सिंह चौहान, जेपी नड्डा, किरण रिजिजू, राजनाथ सिंह लगायतका नेताहरूले पनि शुभकामना व्यक्त गरेका छन्।
यसैगरी योगी आदित्यनाथ सहित विभिन्न राज्यका मुख्यमन्त्रीहरूले पनि पार्टीप्रति शुभकामना व्यक्त गरेका छन्। नेताहरूले पार्टीको विचारधारा, ‘राष्ट्र पहिलो’ को संकल्प तथा ‘अन्त्योदय’ को लक्ष्यलाई दोहोर्‍याउँदै जनसेवा र विकसित भारत निर्माणप्रति प्रतिबद्धता व्यक्त गरेका छन्।