मालदा: औद्योगिक हड्तालको आह्वानका कारण मालदामा बिहानदेखि नै बैंक र बीमा संस्थाहरू अगाडि हड्ताल समर्थकहरूले जुलुस तथा पिकेटिङ गरेका छन्। राज्यस्वामित्वका संस्थाहरू निजीकरणको विरोध, न्यूनतम तलब वृद्धिको माग लगायत विभिन्न मुद्दामा देशभरका श्रमिक संगठनहरूले आज औद्योगिक क्षेत्र बन्दको आह्वान गरेका हुन्। बिहानैदेखि समर्थकहरू सडकमा उत्रिएका छन् भने प्रहरीले कडा निगरानी गरिरहेको छ।
यसैबीच मालदाको इंग्लिसबाजार सहरमा स्टेट बैंक अफ इन्डिया (एसबीआई) मालदा शाखा अगाडि बन्द समर्थक र प्रहरीबीच भनाभन भएको छ। बिहानदेखि नै बैंकको गेट अगाडि पिकेटिङ सुरु गरिएको थियो। गेट अवरुद्ध पारेर पिकेटिङ गरिरहेकै बेला इंग्लिसबाजार पुलिसले गेट खोल्ने प्रयास गरेपछि दुवै पक्षबीच चर्को वाकयुद्ध भएको हो।अर्कोतर्फ, हड्तालको विरोधमा तृणमूल कांग्रेसको श्रमिक संगठन आईएनटीटीयूसी पनि मैदानमा उत्रिएको छ।