दिनहाटा: “यदि कसैले जोडा फूल (तृणमूलको चुनाव चिन्ह) छोडेर कमल फूल (बीजेपीको चुनाव चिन्ह) को कुरा गर्छ भने उसलाई भान्सामा झुन्ड्याइनेछ।” यही भाषामा उत्तर बंगाल विकास मन्त्री उदयन गुहा ले बीजेपीलाई चेतावनी दिएका छन्।
दिनहाटा-१ ब्लकको पुटिमारीमा आयोजित महिला तृणमूलको कार्यकर्ता सभालाई सम्बोधन गर्दै मन्त्री उदयन गुहाले उक्त टिप्पणी गरेका हुन्। भान्सामा ताला झुन्ड्याउने सम्बन्धी मन्त्रीको यस चेतावनीमाथि बीजेपी नेतृत्वले कटाक्ष गरेको छ।
यस सभामा मन्त्रीसँगै महिला तृणमूलकी जिल्ला सभानेत्री सुचिस्मिता दत्त शर्मा, संगठनकी दिनहाटा-१ बी ब्लक सभानेत्री डालिया चक्रवर्ती, तृणमूलका ब्लक अध्यक्ष अनन्त बर्मन उपस्थित थिए। साथै पुटिमारी-१ क्षेत्र अध्यक्ष सुभाष बर्मन, ग्राम पञ्चायत प्रमुख काकली राय बर्मन, तृणमूल नेता आनन्द बर्मन लगायत अन्य कार्यकर्ताहरूको उपस्थिति रहेको थियो।
सभालाई सम्बोधन गर्दै मन्त्रीले थप भने, “लक्ष्मी भण्डार योजनाको रकम पाएर धेरै मानिसहरू टोटो चढेर मतदान गर्न जान्छन्, तर पछि मोदीलाई भोट दिन्छन्। यसमा कार्यकर्ताहरूले नजर राख्नुपर्छ।”
त्यसैगरी महिला तृणमूलको उक्त कार्यकर्ता सभामा जिल्ला सभानेत्री सुचिस्मिता दत्त शर्माले लक्ष्मी भण्डार योजनाका लागि मुख्यमन्त्रीको प्रशंसा गर्दै राज्य सरकारका विभिन्न विकासमुखी कार्यक्रमहरू तथा महिलाको सशक्तिकरणका पहलहरूबारे प्रकाश पारेकी थिइन्।
यता मन्त्रीको उक्त अभिव्यक्तिमाथि प्रतिक्रिया दिँदै बीजेपीका जिल्ला सह–सभापति विराज बसुले भने, “तृणमूल विभिन्न प्रकारका डर–धम्की देखाएर सत्तामा टिकिरहन खोजिरहेको छ। यसबाट कुनै फाइदा हुने छैन। राज्यभरि भ्रष्टाचारको वातावरण बनेको छ, बेरोजगार युवक–युवतीहरूले रोजगारी पाइरहेका छैनन्। त्यसैले आगामी निर्वाचनमा जनताले यस भ्रष्ट दललाई बिदाइ गर्ने प्रतीक्षामा छन्। मन्त्री चेतावनी दिएर प्रचारमा टिकिरहन खोजिरहेका छन्।”