काेलकाता: भारतका गृहमन्त्री अमित शाहले पश्चिम बंगालको सत्तारूढ तृणमूल कांग्रेस सरकारविरुद्ध ‘आरोपपत्र’ सार्वजनिक गर्दै चुनावी अभियान तीव्र बनाएका छन्।
उनले आगामी विधानसभा निर्वाचन राज्य मात्र नभई देशको सुरक्षासँग पनि प्रत्यक्ष रूपमा जोडिएको बताएका छन्।
शाहले मुख्यमन्त्री ममता बनर्जीमाथि आरोप लगाउँदै उनको शासनकालमा बंगाल घुसपैठ, तुष्टीकरण राजनीति र सीमासम्बन्धी असुरक्षाको केन्द्र बनेको दाबी गरे। साथै उनले ममता बनर्जीले ‘पीडित कार्ड’ प्रयोग गरेर राजनीति गरिरहेको आरोप पनि लगाए।
मतदाता सूची पुनरावलोकन प्रक्रियाको विरोध गरेको विषयमा पनि उनले तृणमूल कांग्रेसलाई आलोचना गर्दै उक्त कदम अल्पसंख्यक मत बैंक जोगाउने उद्देश्यले गरिएको दाबी गरे।
शाहले असममा आफ्नो पार्टीको सरकार बनेपछि घुसपैठ नियन्त्रणमा आएको तर अहिले पश्चिम बंगाल घुसपैठको मुख्य प्रवेश मार्ग बनेको बताएका छन्। उनले यसलाई राष्ट्रिय सुरक्षाका लागि गम्भीर चुनौतीका रूपमा उल्लेख गरे।
सिलिगुडी करिडोरको सुरक्षालाई लिएर पनि उनले चिन्ता व्यक्त गर्दै राज्य सरकारले सीमामा बार लगाउन आवश्यक जमिन उपलब्ध नगराएको आरोप लगाए।
उनले आफ्नो पार्टी सत्तामा आए ४५ दिनभित्र सीमामा बार लगाउनका लागि आवश्यक जमिन उपलब्ध गराउने र अवैध आप्रवासीलाई देशबाट बाहिर पठाउने प्रतिबद्धता जनाए।