ढाका: बंगलादेशको राजधानी ढाकाको मिरपुर क्षेत्रमा रहेको एक कपडा कारखानामा भएको भीषण आगलागीमा कम्तीमा १६ जनाको मृत्यु भएको छ। अधिकारीहरूले मृत्यु हुनेको संख्या बढ्न सक्ने सम्भावना रहेको बताएका छन्।
अग्नि नियन्त्रण विभागले अहिलेसम्म भेटिएका १६ वटा शवको पहिचान गर्न गाह्रो भएको बताएको छ। चार तले भवनमा लागेको आगो नियन्त्रणमा लिन अग्नि नियन्त्रकहरूलाई तीन घण्टाभन्दा बढी समय लागेको थियो।
आगो नजिकैको रहेको रासायनिक गोदाममा पनि फैलिएको थियो। त्यहाँ रातिसम्म आगो बलिरहेको थियो। स्थानीय सञ्चारमाध्यमका अनुसार मंगलबार राति ९ बजे (स्थानीय समय) सम्म पनि गोदाममा लागेको आगो पूर्ण रूपमा निभ्न सकेको थिएन।