कोलकाता: भारतका पूर्व रेलमन्त्री मुकुल रॉय को आइतबार ढिलो राति हृदयाघातका कारण निधन भएको छ। उनी ७१ वर्षका थिए। परिवारका अनुसार कोलकातास्थित एक निजी अस्पतालमा राति करिब डेढ बजे उनले अन्तिम सास फेरेका हुन्। केही दिनयता उनी कोमामा रहेको जनाइएको छ।
रॉय सन् १९९८ मा तृणमूल कांग्रेस स्थापना हुँदा संस्थापक सदस्यका रूपमा सक्रिय थिए। पछि दलभित्रको मतभेदपछि उनी सन् २०१७ मा भारतीय जनता पार्टी मा प्रवेश गरेका थिए।
सन् २०२१ को पश्चिम बंगाल विधानसभा निर्वाचनमा उनले भाजपाको उम्मेदवारका रूपमा कृष्णानगर उत्तर क्षेत्रबाट विजय हासिल गरेका थिए। तर निर्वाचनपछि उनी पुनः तृणमूल कांग्रेसमै फर्किएका थिए।
आफ्नो लामो राजनीतिक यात्रामा रॉयले सन् २०११ मा संयुक्त प्रगतिशील गठबन्धन (युपीए) सरकारको दोस्रो कार्यकालमा रेलमन्त्रीको जिम्मेवारी सम्हालेका थिए। त्यतिबेला तृणमूल कांग्रेस केन्द्र सरकारको सहयात्री दल थियो। उनी पश्चिम बंगालबाट दुई पटक राज्यसभाका लागि निर्वाचित भएका थिए।
उनको निधनसँगै पश्चिम बंगालको राजनीतिमा एक प्रभावशाली अध्यायको अन्त्य भएको टिप्पणी राजनीतिक वृत्तमा गरिएको छ।