नयाँ दिल्ली: देशका प्रमुख विमानस्थलहरूमा तैनाथ सुरक्षा बलमा ठूलो परिवर्तनको प्रस्ताव आएको छ। केन्द्रीय औद्योगिक सुरक्षा बल (सीआईएसएफ) का करिब १२ हजार जवानलाई हटाउने तयारी गरिएको छ।
ब्यूरो अफ सिभिल एभिएसन सेक्युरिटी (बीसीएएसट) ले देशभरका ७० भन्दा बढी विमानस्थलको सुरक्षा समीक्षा गरेपछि यस्तो सूची तयार पारेको हो। हाल करिब ५० हजार सीआईएसएफ जवानमध्ये केहीलाई घटाउने प्रस्ताव गरिएको बताइएको छ।
स्रोतका अनुसार उक्त सूची नागरिक उड्डयन मन्त्रालय र सम्बन्धित निकायहरूलाई बुझाइएको छ। अहिले विश्वभर बढ्दो सुरक्षा चुनौतीका बीच यति ठूलो संख्यामा जवान हटाउनु उपयुक्त हुन्छ कि हुँदैन भन्ने विषयमा छलफल भइरहेको छ।
मन्त्रालयसँग सम्बन्धित अधिकारीहरूले भनेका छन् कि यसबाट सुरक्षा कमजोर हुने छैन। समीक्षा क्रममा संवेदनशील, अतिसंवेदनशील र कम जोखिम भएका क्षेत्रहरू छुट्याइएको छ। कम जोखिम भएका स्थानमा निजी सुरक्षा गार्ड राखेर पनि काम चलाउन सकिने निष्कर्ष निकालिएको छ।
सबैभन्दा धेरै सीआईएसएफ जवान दिल्ली, मुम्बई, बेंगलुरु, हैदराबाद र चेन्नई जस्ता ठूला विमानस्थलहरूमा तैनाथ छन्। अध्ययनले देखाएको छ कि केही स्थानमा प्रशिक्षित सीआईएसएफ जवानको आवश्यकता कम भएकाले त्यहाँ निजी सुरक्षाकर्मी प्रयोग गर्न सकिन्छ।
यस निर्णयले खर्च घट्ने र सञ्चालनमा सहजता आउने दाबी गरिएको छ, तर जहाँ आवश्यक हुन्छ त्यहाँ सीआईएसएफ जवानलाई यथावत राखिने बताइएको छ।