नयाँ दिल्ली: यस वर्ष सम्पन्न दिल्ली विधानसभा चुनावमा कांग्रेसले पार्टी प्रचार तथा सामाजिक सञ्जाल अभियानमा भाजपा भन्दा बढी खर्च गरे पनि पार्टीले एक सिटसमेत जित्न नसकेको तथ्य बाहिर आएको छ। यो जानकारी एसोसिएसन फर डेमोक्रेटिक रिफर्म्स (एडीआर) ले सार्वजनिक गरेको विवरणमा उल्लेख छ।
भारत निर्वाचन आयोगमा बुझाइएका चुनाव खर्च विवरणको विश्लेषणअनुसार भाजपा को कुल खर्च ५७.६५ करोड रुपैयाँ रहेको छ भने कांग्रेसले ४६.१९ करोड रुपैयाँ खर्च गरेको छ। चुनावका लागि संकलित कुल रकममा पनि भाजपा ८८.७ करोड रुपैयाँ सहित अग्रस्थानमा रह्यो, जबकि कांग्रेसले ६४.३ करोड रुपैयाँ संकलन गर्‍यो।
७० सिट रहेको दिल्ली विधानसभा चुनावमा भाजपा ले ४८ सिट जित्दा आम आदमी पार्टी (आप) ले २२ सिट हासिल गर्‍यो। कांग्रेस भने शून्य सिटमै सीमित रह्यो।
एडीआरका अनुसार ‘आप’ ले कुल १४.५ करोड रुपैयाँ खर्च गरेको छ, जसमा १२.१२ करोड पार्टी प्रचार र २.४ करोड उम्मेदवार मा खर्च गरिएको छ। सामाजिक सञ्जाल प्रचारमा कांग्रेसले ५.९५ करोड रुपैयाँ, ‘आप’ ले करिब ३ करोड रुपैयाँ र भाजपा ले मात्र ५.२६ लाख रुपैयाँ खर्च गरेको देखिन्छ।
रिपोर्टअनुसार हालसम्म नौ राजनीतिक दलले कुल १२०.३ करोड रुपैयाँ खर्च गरेका छन्, जसमा २७ करोड रुपैयाँ उम्मेदवारमा खर्च भएको छ। चुनाव अवधिमा सबै दलहरूले गरी १७०.६८ करोड रुपैयाँ संकलन गरेका थिए।