बैकक: थाइल्याण्डसँग जारी झडपका बीच कम्बोडियाले तत्काल युद्धविरामको माग गरेको छ। दुई देशबीच दुई दिनदेखि सीमापार द्वन्द्व भइरहेको छ।
संयुक्त राष्ट्र संघका लागि कम्बोडियाका राजदूत छिया केओले आफ्नो देशले कुनै पनि शर्त बिना द्वन्द्वको अन्त्यको माग गरेको बताए। उनले आफ्नो देशले विवादको शान्तिपूर्ण समाधान चाहेको पनि बताए।
यद्यपि थाइल्याण्डले कम्बोडियाको प्रस्तावमा सार्वजनिक रूपमा टिप्पणी गरेको छैन। यसअघि थाइल्याण्डले कम्बोडियासँग सीमा जोडिएका आठ जिल्लामा मार्शल ल घोषणा गरेको थियो।
बिहीबारदेखि दुई देशबीचको झडप सुरु भएदेखि कम्तीमा १६ जनाको मृत्यु भएको छ र १०,००० भन्दा बढी मानिसले आफ्नो घर छोड्न बाध्य भएका छन्।
थाइल्याण्ड र कम्बोडियाले पहिले गोलीबारी भएकोमा एकअर्कालाई दोष लगाइरहेका छन्।