कोलकाता: नयाँ वर्षको अवसरमा देशभर उत्साह छाएको छ। पश्चिम बंगालमा पनि आठदेखि अस्सी वर्षसम्मका मानिसहरू उत्सवमय वातावरणमा देखिएका छन्। अंग्रेजी पात्रोअनुसार आज वर्षको पहिलो दिन मात्र होइन, सत्तारूढ तृणमूल कांग्रेसको स्थापना दिवससमेत हो।
यस अवसरमा तृणमूल कांग्रेसकी अध्यक्ष तथा पश्चिम बंगालकी मुख्यमन्त्री ममता बनर्जीले महत्वपूर्ण राजनीतिक सन्देश दिएकी छन्। उनले सामाजिक सञ्जाल एक्समार्फत सन् १९९८ मा आजकै दिन ‘माँ–माटी–मानुष’को सेवाको लक्ष्यसहित तृणमूल कांग्रेसको यात्रा सुरु भएको स्मरण गराइन्।
ममता बनर्जीले पार्टीको ऐतिहासिक यात्राको मूल उद्देश्य देशको गरिमा जोगाउनु, बंगालको विकास गर्नु र जनताको लोकतान्त्रिक अधिकारको रक्षा गर्नु रहेको बताइन्। उनले पार्टीका कार्यकर्ता र समर्थकको त्याग तथा संघर्षको सम्मान गर्दै कुनै पनि दबाब वा शक्तिसामु नझुक्ने स्पष्ट सन्देश दिइन्।
यस वर्ष राज्यमा विधानसभा निर्वाचन हुन लागेको सन्दर्भमा मुख्यमन्त्री बनर्जीले भाजपा विरुद्ध आरोप लगाउँदै दुष्प्रचार र एसआईआर प्रक्रियामार्फत मतदाताको नाम हटाउने षड्यन्त्रविरुद्ध संघर्ष अझ तीव्र बनाउने आह्वान गरिन्।