कोचबिहार: दिनहाटा क्षेत्रको प्राचीन व्यापारिक केन्द्र चौड़ाहाट बजारमा माछा, मासु र कच्चा मालका पसलका शेडहरू जीर्ण र खतरनाक अवस्थामा रहेकोले दिनहाटा महकुमा व्यापारी संघले तुरुन्तै नयाँ सिरेबाट मर्मत/पुनर्निर्माणको माग गरेको छ। संघको तर्फबाट चौड़ाहाट बजारसहित दिनहाटा महकुमाका विभिन्न क्षेत्रमा रहेका हाट–बजारहरूको समग्र विकासका माग लिएर कोचबिहार जिल्ला नियन्त्रणित बजार समितिका सचिवलाई ज्ञापनपत्र बुझाइएको छ।
संगठनका सामान्य सचिव राणा गोस्वामीको नेतृत्वमा एक प्रतिनिधि टोलीले नियन्त्रणित बजार समितिका सचिवसँग भेटेर यस मागपत्र बुझाएको थियो। राणा गोस्वामीले बताए अनुसार, लामो समयदेखि चौड़ाहाट बजारसहित महकुमाका धेरै बजारहरूको अवस्था खराब छ। यस विषयमा पहिले पनि प्रशासनलाई माग राखिएको थियो, तर अहिलेसम्म कुनै सुधार भएको छैन। बजारहरूको विकास र ग्राहक–बिक्रेताको हितका लागि यदि छिटो मर्मत कार्य नगरेमा यो विषय आगामी दिनमा राज्यकी मुख्यमन्त्री ममता बनर्जी र उत्तर बंगाल विकास मन्त्री उदयन गुहा समक्ष उठाइनेछ।
उहाँले थप जानकारी दिँदै भने कि बजारहरूको नवीनीकरणका लागि कोचबिहार जिल्ला नियन्त्रणित बजार समितिका सचिवको कार्यालयमा विस्तृत मागहरू राखिएको छ। यसमा प्राचीन चौड़ाहाट बजारको पश्चिमी भागमा रहेका माछा, मासु र कच्चा मालका पसलका शेडहरूको खतरनाक अवस्थाको उल्लेख गरिएको छ। साथै बजारमा स्टलहरूको अवैध बिक्री, केही व्यापारीहरूले दुई स्टलबीचको पर्खाल तोडेर पसल विस्तार गर्दा भवनलाई हुन सक्ने क्षति, र यस अवैध क्रियाकलापमा कारबाहीको माग पनि समावेश छ।
त्यसैगरी दिनहाटाका ग्रामीण बजारहरूको समग्र नवीनीकरण, फोहर र ढल निकासको सफाइ, शौचालयहरूको सरसफाइ, साथै बसन्तीहाट, गोबराछड़ा र बामनहाट लगायतका विभिन्न बजारमा नयाँ स्टल निर्माण गरी व्यापारीहरूमा वितरण जस्ता मागहरू पनि राखिएका छन्। यदि नियन्त्रणित बजार समितिले कुनै कदम नचालेमा आवश्यक परेमा यो माग मुख्यमन्त्री समक्ष पनि राखिनेछ।