नयाँ दिल्ली: प्रधानमन्त्री नरेन्द्र मोदीले पश्चिम एशियामा जारी द्वन्द्वका बीच खाडी देशहरूले त्यहाँ रहेका भारतीय नागरिकलाई सहयोग गरेको भन्दै आभार व्यक्त गरेका छन्।
आइतबार प्रसारित आफ्नो मासिक कार्यक्रम ‘मन की बात’मा बोल्दै उनले करिब एक करोड भारतीय खाडी क्षेत्रका विभिन्न देशहरूमा बसोबास तथा रोजगारीमा रहेको उल्लेख गरे। कठिन परिस्थितिमा ती देशहरूले भारतीयहरूको सुरक्षाका लागि सहयोग गरेको उनले बताए।
पश्चिम एशियामा हाल इरान–इजरायल द्वन्द्वका कारण तनाव बढिरहेको छ। इरान र इजरायल बीचको टकरावमा संयुक्त राज्य अमेरिका समेत संलग्न देखिएको छ, जसले क्षेत्रीय सुरक्षा अवस्थालाई थप जटिल बनाएको छ।
प्रधानमन्त्री मोदीले भारतका नागरिकलाई सतर्क रहन र अफवाहबाट टाढा रहन आग्रह गरेका छन्। उनले यो चुनौतीपूर्ण समयमा एकजुट भएर परिस्थितिको सामना गर्नुपर्ने बताए।
यसैबीच, होर्मुज जलडमरूमध्यमा देखिएको अवरोधले विश्वव्यापी आपूर्ति र अर्थतन्त्रमा असर पार्ने चिन्ता व्यक्त गरिएको छ।