जलपाईगुडी: वाचा गरे पनि सिँचाइ विभागले पुल नबन्दा आज स्थानीयले सिँचाइ विभागका अधिकारीलाई पुष्पगुच्छा दिएर पुल निर्माणको माग दोहोर्‍याएका छन्।
जलपाईगुडी सदर ब्लकको खरिया ग्राम पञ्चायत अन्तर्गत सानु पाडाबाट बग्ने गद्दर नहरमा बनेको अवस्थित पुल जीर्ण अवस्थामा छ।
दैनिक यात्रुहरू यस पुलबाट आफ्नो जीवन जोखिममा पारेर आवतजावत गर्छन्। गाउँलेसहित स्थानीय पञ्चायत सदस्यले पटक–पटक नयाँ पुल निर्माणको माग गर्दै आएका छन्। सिँचाइ विभागले पनि पुल निर्माण गर्ने आश्वासन दिए पनि निर्माण हुन सकेको छैन।
शुक्रबार प्रभावित क्षेत्रका बासिन्दाले सिँचाइ विभागका जिम्मेवार अधिकारीलाई हातमा माला लगाएर स्वागत गर्दै पुल निर्माणको माग दोहोर्‍याएका थिए।
यस सम्बन्धमा स्थानीय जनप्रतिनिधि गणेश घोषले स्थानीयवासीले धेरै निवेदन दिएको बताए।
आज फूलको मालासहित मौन बिरोध प्रकट गर्दै पुल निर्माण गर्न सम्बन्धित विभागसँग माग गरिएको छ।
पुल निर्माणको माग गर्दै पोस्टर पनि टाँसिएको छ।