खरसाङ: आज खरसाङ नगरमा आयोजित चुनावी सभालाई सम्बोधन गर्दै सांसद राजु विष्टले पार्टी तथा गठबन्धनका उम्मेदवार सोनम लामालाई सार्वजनिक रूपमा परिचय गराएका छन्। उनले सभामा उपस्थित जनतासँग प्रत्यक्ष संवाद गर्दै क्षेत्रको भविष्यका लागि आफ्नो दृष्टिकोणसमेत प्रस्तुत गरेका थिए।
सांसदले उम्मेदवार लामालाई युवाशक्ति र संघर्षबाट अघि बढेको नेतृत्वको रूपमा चित्रण गर्दै, विद्यार्थी जीवनदेखि नै सार्वजनिक सेवामा सक्रिय रहँदै इमान्दारी र समर्पणका साथ कर्सियाङ क्षेत्रका जनताको सेवा गर्दै आएको उल्लेख गरे।
उनले कर्सियाङ पहिले गुणस्तरीय शिक्षाको केन्द्रका रूपमा चिनिन्थ्यो, जहाँ टाढा–टाढाबाट विद्यार्थीहरू अध्ययनका लागि आउने गर्थे, तर अहिले त्यो पहिचान क्रमशः हराउँदै गएको बताए। स्थानीय युवाहरू रोजगारीको खोजीमा देश–विदेशतर्फ पलायन हुन बाध्य भएको अवस्था प्रति उनले चिन्ता व्यक्त गरे।
उनका अनुसार वर्तमान राज्य सरकारको नीतिका कारण क्षेत्र विकास र अवसरबाट वञ्चित भएको छ। स्थानीय युवाका लागि रोजगारीको अभाव रहेको र उपलब्ध अवसरहरू पनि पक्षपात र नातावादका आधारमा वितरण हुने गरेको आरोप उनले लगाए।
सांसदले आफ्नो पार्टीले यस अवस्थालाई परिवर्तन गर्ने प्रतिबद्धता व्यक्त गर्दै शिक्षित युवाहरूलाई रोजगारीका लागि आफ्नै क्षेत्रमा अवसर सिर्जना गरिने बताए। विश्वस्तरीय शैक्षिक संस्थाहरू स्थापना, पर्यटन प्रवर्द्धन, गृहआवास सेवा विकास, दिगो कृषि प्रणालीमा जोड तथा उत्पादनलाई ठूला बजारहरूसँग जोड्ने योजना अघि सारिएको उनले जानकारी दिए।
त्यसैगरी, पूर्वाधार विकास, शिक्षा क्षेत्रको सुदृढीकरण तथा गुणस्तरीय स्वास्थ्य सेवाको व्यवस्था गरिने उनले बताए। गोर्खा समुदायका अधिकार सुनिश्चित गर्न, संवैधानिक समाधान, चिया बगान, सिन्कोना बगान र वन क्षेत्रका बासिन्दाहरूका भूमि अधिकार सुनिश्चित गरिने प्रतिबद्धता पनि उनले व्यक्त गरे।
सांसदले चिया उद्योग पुनर्जीवन, बन्द चिया बगान सञ्चालन तथा श्रमिकहरूको पारिश्रमिक वृद्धि गर्ने योजनासमेत उल्लेख गरे। साथै, क्षेत्रमै उच्चस्तरीय प्राविधिक तथा व्यवस्थापन शिक्षालयहरू स्थापना गर्ने लक्ष्य लिइएको बताए।
अन्त्यमा उनले कर्सियाङका जनतालाई उम्मेदवार लामालाई समर्थन गर्न, मतदान गर्न र विजय गराउन आग्रह गर्दै गोर्खा समुदायको एकता, आत्मसम्मान र समृद्धिको पक्षमा उभिन अपिल गरे।