नयाँ दिल्ली: कश्मीर उपत्यकाले अब सबै मौसममा भरपर्दो रेल सम्पर्कको प्रत्यक्ष लाभ लिन थालेको छ। भारतीय रेलले पहिलोपटक ४२ डब्बाको पूर्ण रेकमार्फत २,७६८ मेट्रिक टन चामल अनन्तनाग पुर्‍याएको छ। उक्त रेक जनवरी २२ मा उपत्यकामा पुगेको हो।
रेल मन्त्रालयका अनुसार यसअघि उपत्यकामा २१ डब्बाको मिनी रेक मात्र सञ्चालन हुँदै आएको थियो। नयाँ रेक जनवरी २१ मा पञ्जाबको सङ्गरूरबाट लोड गरी २४ घण्टाभित्र अनन्तनाग गुड्स शेडमा पुर्‍याइएको हो।
खाद्य निगम (एफसीआई) सँगको समन्वयमा गरिएको यस पहलले ढुवानी लागत घटाउने र हिउँदमा आवश्यक खाद्यान्न भण्डारण सुनिश्चित गर्ने विश्वास गरिएको छ।
रेलमार्फत ढुवानी बढेपछि राजमार्गमा ट्रक निर्भरता घट्ने, वातावरणीय लाभ हुने र उधमपुर–श्रीनगर–बारामुला रेल परियोजनाको प्रभावकारिता थप पुष्टि भएको रेल अधिकारीहरूले बताएका छन्।