नयाँ दिल्ली: भारतीय युवा कांग्रेसका कार्यकर्ताहरुले शुक्रबार ‘एआई इम्प्याक्ट समिट’ को प्रदर्शनी हलमा पुगेर अमेरिकासँगको व्यापार सम्झौताप्रति विरोध जनाए र प्रधानमन्त्री नरेन्द्र मोदीविरुद्ध नाराबाजी गरे। प्रहरीले केही समयपछि प्रदर्शनकारीहरुलाई त्यहाँबाट हटाइदिए र हिरासतमा लिएका छन्।
एक वरिष्ठ प्रहरी अधिकृतले जानकारी दिँदै भने, “एआई इम्प्याक्ट समिटको विरोध प्रदर्शनका क्रममा लगभग १० जनालाई हिरासतमा लिइएको थियो। उनीहरुलाई तुरुन्तै त्यहाँबाट हटाएर तिलक मार्ग प्रहरी चौकी लगिएको छ। कानूनी-व्यवस्थाको स्थिति खलल पुर्याउनेको कुनै पनि गतिविधिलाई सहन गरिने छैन।”
युवा कांग्रेससँग सम्बन्धित प्रदर्शनकारीहरू हल नम्बर-५ भित्र मार्च गर्दै पुगे। उनीहरू सेतो टी-शर्ट लगाएर आएका थिए जसमा प्रधानमन्त्री मोदी र अमेरिकी राष्ट्रपति डोनाल्ड ट्रम्पका तस्बिरहरू थिए, र ती शर्टमा “इण्डिया यूएस ट्रेड डील”, “एपस्टीन फाइल्स”, र “पीएम इज कम्प्रोमाइज्ड” जस्ता नारा लेखिएका थिए। केही प्रदर्शनकारीहरूले त आफ्ना शर्टहरू समेत खोलिदिए। यस विरोध प्रदर्शनका कारण त्यहाँ हंगामा मच्चियो र केही सहभागी र प्रदर्शनकारीहरूको बीचमा तिव्र बहस पनि भयो। घटनास्थलमा खटिएका एक प्रहरी कर्मचारीले भने, “यो दुर्भाग्यपूर्ण घटना” पछि हलको भित्र सुरक्षा कडा गरिनेछ। यो विरोध प्रदर्शन केही मिनेटमै समाप्त भयो र त्यसपछि प्रदर्शनकारीहरूलाई हलबाट बाहिर निकालिएको थियो। यो घटना समिटमा सहभागी अन्य पाहुनाहरू र आगन्तुकहरूको लागि अप्रत्याशित थियो।
यो आयोजन १६ देखि २० फेब्रुअरी २०२६ सम्म भारत मण्डपममा भइरहेको छ, जहाँ विभिन्न राष्ट्रका प्रमुख, विश्वव्यापी एआई क्षेत्रका नेता, शिक्षाविद्हरु, शोधकर्ता, र प्रमुख प्रौद्योगिकी कम्पनीका प्रमुखहरू भाग लिइरहेका छन्। प्रधानमन्त्री नरेन्द्र मोदीले बिहीबार यहाँ एआई इम्प्याक्ट समिट २०२६ को औपचारिक उद्घाटन गरेका थिए, जहाँ विभिन्न विश्व नेता र प्रमुख प्रौद्योगिकी कम्पनीका प्रमुख उपस्थित थिए।